ახალი ამბები

აშშ-ის იუსტიციის დეპარტამენტი 1 მილიარდ დოლარზე მეტი ღირებულების სანქცირებული რუსული აქტივების უკრაინისთვის გაგზავნას ცდილობს. ამ ინფორმაციას 3 სექტემბერს CBS ავრცელებს.

2022 წლის თებერვლის ბოლოდან, როდესაც უკრაინაში ომი დაიწყო, აშშ-ის ხელისუფლებამ მთელ მსოფლიოში 1 მილიარდ დოლარზე მეტი ღირებულების რუსული აქტივების კონფისკაცია მოახდინა.

"ჩვენ ვითხოვთ კონგრესის ნებართვას, რომ მიღებული აქტივები უკრაინელი ხალხის საკეთილდღეოდ გამოვიყენოთ." - განუცხადა CBS-ს ამერიკის გენერალური პროკურორის პირველმა მოადგილემ ლიზა მონაკომ.

Reuters-ის ცნობით, აშშ-ის გენერალურმა პროკურორმა მერიკ გარლანდმა უკრაინისთვის რუსი ოლიგარქის აქტივების გადაცემის ნებართვა პირველად მაისში გასცა, რომელიც მას სანქციების დარღვევისთვის ჩამოერთვა.

საუბარია კონსტანტინ მალოფეევის აქტივებზე.

2022 წლის აპრილში აშშ-ის იუსტიციის დეპარტამენტმა ის რუსეთის წინააღმდეგ დაწესებული სანქციების დარღვევაში დაადანაშაულა. ამერიკის ხელისუფლების განცხადებით, მალოფეევი ფინანსურად უჭერდა მხარს რუსებს და ყირიმში სეპარატისტულ განწყობებს აღვივებდა.