ახალი ამბები

1 დეკემბერს ბაქოს სასამართლომ, ოპოზიციის ლიდერს, ალი ქარიმლის 2 თვითა და 15 დღით წინასწარი პატიმრობა მიუსაჯა.

ქარიმლის ძალადობრივ გადატრიალებაში ედება ბრალი, მას 12-წლიანი პატიმრობა ემუქრება.

ვითარების არსი: 29 ნოემბერს ბაქოში, ოპოზიციური პარტიის, "აზერბაიჯანის სახალხო ფრონტის" ლიდერი ალი ქარიმლი დააკავეს.

• ქარიმლის თანაპარტიელების თქმით, დაკავებამდე მის სახლში უშიშროების სამსახურმა ჩხრეკა ჩაატარა.
  
  
• გამოძიების მტკიცებით, ოპოზიციონერის სახლში რამიზ მეხტიევის წერილები იპოვეს.
  
  
• მეხტიევი პრეზიდენტის ადმინისტრაციისა და მეცნიერებათა აკადემიის ყოფილი ხელმძღვანელია, რომელსაც სახელმწიფო გადატრიალებას ედავებიან. 14 ოქტომბერს ბაქოს სასამართლომ მეხტიევს ოთხთვიანი შინაპატიმრობა მიუსაჯა.
  
  
• გარდა ამისა, წინასწარი პატიმრობა მიესაჯა "სახალხო ფრონიტს" პრეზიდიუმის წევრს, მამედ იბრაჰიმს.
• ქარიმლი მეხტიევთან კავშირს უარყოფს და ბრალდებას პოლიტიკურად მოტივირებულს უწოდებს.

წინარე ისტორია: ქარიმლი 1992 წლიდან "აზერბაიჯანის სახალხო ფრონტის" წევრია.

• 1993 წელს, "სახალხო ფრონტის" ხელისუფლებაში ყოფნის პერიოდში იკავებდა სახელმწიფო მდივნის თანამდებობას.
  
  
• ჰეიდან ალიევის ხელისუფლებაში მოსვლის შემდეგ არის ოპოზიციაში.
  
  
• 2000 წლიდან დღემდე არის "სახალხო ფრონტის" თავმჯდომარე.

დიდი სურათი: აზერბაიჯანელი უფლებადამცველები მიიჩნევენ, რომ ქარიმლის დაკავება რეპრესიების ახალი ტალღის ნაწილია და მის გათავისუფლებას ითხოვენ. 

• 2025 წლის ოქტომბრისთვის, აზერბაიჯანში 392 ადამიანია დაკავებული, რომელთაც დამოუკიდებელი უფლებადამცველები პოლიტპატიმრებად მიიჩნევენ.
   
• გარდა ამისა, ილჰამ ალიევის ხელისუფლების მაკრიტიკებელი ათობით ჟურნალისტი, აქტივისტი და პოლიტიკოსი იძულებული გახდა ქვეყანა დაეტოვებინა.