ახალი ამბები

ამერიკის კონგრესის რესპუბლიკელმა წევრმა ლიზ ჩეინიმ ყოფილი პრეზიდენტი, დონალდ ტრამპი ამერიკის ინტერესების წინააღმდეგ მოქმედებაში დაადანაშაულა. ყოფილმა პრეზიდენტმა უკანასკნელ ინტერვიუში ვლადიმირ პუტინს ხოტბა შეასხა.

"ექს-პრეზიდენტ ტრამპის მიერ პუტინისთვის ხოტბის შესხმა, მათ შორის, მისი "გენიოსად" მოხსენიება, ჩვენს მტრებს ეხმარება. ტრამპის ინტერესები არ ემთხვევა ამერიკის შეერთებული შტატების ინტერესებს", - წერს ჩეინი ტვიტერზე.

The Clay Travis and Buck Sexton Show-ში ტრამპმა განაცხადა, რომ მისი პრეზიდენტობის შემთხვევაში პუტინი სეპარატისტული "რესპუბლიკების" დამოუკიდებლობას არ ცნობდა.

ექს-პრეზიდენტმა ასევე აღნიშნა, რომ პუტინის სტრატეგია "გენიალური" და "საკმაოდ საზრიანი" იყო.

"მე ვთქვი, 'რამდენად ჭკვიანურია ეს?' ის შევა და მშვიდობისმყოფელი იქნება. შეგვიძლია იგივე გავაკეთოთ ამერიკის სამხრეთ საზღვარზე - ეს არის ყველაზე დიდი სამშვიდობო ძალა ისტორიაში. ეს არის ყველაზე მეტი ტანკი, რაც კი ოდესმე მინახავს და ისინი მშვიდობას შეინარჩუნებენ." - თქვა ამერიკის ექსპრეზიდენტმა.