ახალი ამბები

ევროკავშირმა კომენტარი გააკეთა ალექსანდრ ლუკაშენკას რეჟიმის მიერ რამდენიმე პოლიტპატიმრის გათავისუფლებაზე და გაიხსენა, რომ ბელორუსის ციხეებში პოლიტიკური მიზეზების გამო ასობით ადამიანი იმყოფება.

ამის შესახებ ევროპის საგარეო სამსახურის წარმომადგენლის განცხადებაშია ნათქვამი.

ევროკავშირმა შენიშნა ბელორუსში რამდენიმე პოლიტპატიმრის გათავისუფლება, რომლებიც მსჯავრდებული იყვნენ 2020 წლის გაყალბებული საპრეზიდენტო არჩევნების საპროტესტო აქციებში მონაწილეობისთვის და იზიარებს "გათავისუფლებულთა და მათი ოჯახების შვებას და სიხარულს."

"ჩვენ ასევე ვითვალისწინებთ იმ ფაქტს, რომ გათავისუფლებულთაგან ზოგიერთი იყო პატიმარი, რომლებსაც ესაჭიროებოდათ სასწრაფო სამედიცინო დახმარება და მოვუწოდებთ ხელისუფლებას, უზრუნველყონ ყველა პატიმარისტვის ადეკვატური სამედიცინო დახმარება," - აღნიშნა მან.

ევროკავშირის საგარეო საქმეთა სამსახურმა გაიხსენა, რომ ბელორუსში 1300-ზე მეტი პოლიტპატიმარი რჩება, მათ შორის სერგეი ტიხანოვსკი, იგორ ლოსიკი, მარია კოლესნიკოვა, ნიკოლაი სტატკევიჩი, მაქსიმ ზნაკი და ვიქტორ ბაბარიკო.

"ევროკავშირი კვლავ მოუწოდებს ბელორუსის ხელისუფლებას დაუყოვნებლივ და უპირობოდ გაათავისუფლოს ყველა პოლიტპატიმარი, რომლებიც ხშირად იმყოფებიან იმ პირობებში, რომლებიც საფრთხეს უქმნის მათ სიცოცხლეს," - ნათქვამია განცხადებაში.

ამ კვირაში, ბელორუსმა უფლებადამცველებმა განაცხადეს, რომ სულ მცირე შვიდი ადამიანი გაათავისუფლეს, რომლებიც ლუკაშენკას რეჟიმის სასამართლოებმა გაყალბებული ბრალდებებით გაასამართლეს.

მანამდე, 16 აგვისტოს, ალექსანდრ ლუკაშენკამ ხელი მოაწერა განკარგულებას "საპროტესტო დანაშაულისთვის" მსჯავრდებული 30 ადამიანის შეწყალების შესახებ, მათ შორის არის 14 ქალი და 16 მამაკაცი. შეწყალებულთა ვინაობა არ სახელდება.