ახალი ამბები

ევროკომისიის პრეზიდენტმა, ურსულა ფონ დერ ლაიენმა განაცხადა, რომ 90 მილიარდი ევროს მოცულობის სესხიდან უკრაინისთვის პირველი პაკეტი მიმდინარე კვარტალში გაიცემა - ის დაახლოებით 6 მილიარდ ევროს შეადგენს და უკრაინულ დრონებს მოხმარდება.

ვითარების არსი: 29 აპრილს, ევროპარლამენტის პლენარულ სხდომაზე გამოსვლისას, ურსულა ფონ დერ ლაიენმა დაადასტურა ევროკავშირის სურვილი, რომ 90-მილიარდიანი სესხის პირველი 6-მილიარდიანი ტრანში უკრაინას 2026 წლის მეორე კვარტალში გადაერიცხოს.

• "გაზაფხულზე ჩვენ ვთქვით, რომ უკრაინას 90-მილიარდიან სესხს ამა თუ იმ გზით მივაწვდიდით. ახლა ჩვენ ეს დაპირება შევასრულეთ. 2026 წლისთვის განკუთვნილი 45 მილიარდი ევროს პირველ ტრანშს სწორედ ამ კვარტალში გავგზავნით." - აღნიშნა ევროკომისიის პრეზიდენტმა.

ჩაშლილად: მან ევროპარლამენტის წევრებს შეახსენა, რომ ევროკავშირის 90-მილიარდიანი სესხის ერთი მესამედი უკრაინის საბიუჯეტო საჭიროებებს მოხმარდება, ხოლო ორი მესამედი - ქვეყნის თავდაცვას.

• "პირველი პაკეტი დაახლოებით 6 მილიარდი ევროს ღირებულების იქნება და ის უკრაინაშივე წარმოებულ დრონებს მოხმარდება," - ხაზი გაუსვა ევროკომისიის პრეზიდენტმა.
• მან პირობა დადო, რომ ევროკავშირი "გააგრძელებს მამაცი უკრაინელი ხალხისა და მისი შეიარაღებული ძალების მხარდაჭერას."
• "მაშინ, როცა რუსეთი აორმაგებს აგრესიას, ევროპა აორმაგებს უკრაინის მხარდაჭერას," - აღნიშნა ურსულა ფონ დერ ლაიენმა.
• უკრაინის პრეზიდენტმა ვოლოდიმირ ზელენსკიმ ასევე განაცხადა, რომ 90 მილიარდიდან პირველი სამხედრო ტრანში "უკრაინის შიდა სამხედრო წარმოებაზე დაიხარჯება."

კონტექსტი: ამავდროულად, Bloomberg-ის ცნობით, ევროკავშირმა შესაძლოა გაამკაცროს მოთხოვნები უკრაინისთვის 90 მილიარდი ევროს სესხის გასაცემად.

• დისკუსიის საგანია ცვლილებები უკრაინის საგადასახადო შეღავათების რეჟიმში, რომელიც ამჟამად ზოგიერთი უკრაინული კომპანიისთვის მოქმედებს.
• ეს სქემა, რომელიც თავდაპირველად ინდივიდუალური მეწარმეებისა და მცირე საწარმოებისთვის შეიქმნა, კომპანიებს საშუალებას აძლევს, გადაიხადონ მინიმალური განაკვეთი - შემოსავლის 5%. უკრაინის ფინანსთა სამინისტრო ამტკიცებს, რომ ეს მოდელი ტვირთად აწვება სამხედრო ბიუჯეტს, ამახინჯებს კონკურენციას და ხელს უწყობს დიდი ჩრდილოვანი ეკონომიკის არსებობას.
• Bloomberg-ის წყაროებმა განაცხადეს, რომ ევროკავშირი უკრაინის ხელისუფლებას მოსთხოვს, 20%-იანი დამატებული ღირებულების გადასახადი დაუწესონ იმ კომპანიებს, რომლებიც ამჟამად შეღავათიანი სისტემით მუშაობენ და რომელთა წლიური შემოსავალი 4 მილიონ ჰრივნას (244 ათასი ლარი - რედ.) აღემატება.