ახალი ამბები

საგარეო პოლიტიკისა და უსაფრთხოების საკითხებში ევროკავშირის ყოფილი უმაღლესი წარმომადგენელი და ევროპის კოლეჯის რექტორი ფედერიკა მოგერინი კორუფციის შესახებ მიმდინარე გამოძიების ფარგლებში, ბელგიის პოლიციამ დააკავა. ამ ინფორმაციას Euractiv გამოძიების შესახებ ინფორმირებულ ორ პირზე დაყრდნობით ავრცელებს.

ვითარების არსი: ბელგიის პოლიციამ ჩხრეკა ჩაატარა ევროკავშირის დიპლომატიურ სამსახურში, ევროპის კოლეჯში და კერძო სახლებში, ევროკავშირის სახსრების სავარაუდო არასათანადო ხარჯვის შესახებ გამოძიების ფარგლებში.

• Euractiv-ის ინფორმაციით, გამოძიება ცდილობს დაადგინოს, იცოდნენ თუ არა წინასწარ ევროპის კოლეჯში ევროკავშირის დიპლომატიური აკადემიის დასაფინანსებლად გამოცხადებული ტენდერის შესახებ.
• ახალი დიპლომატიური აკადემია, რომლის ფარგლებშიც სწავლება ევროპის კოლეჯში მიმდინარეობს, ევროკავშირის საგარეო ქმედებათა სამსახურის მიერაა დაფინანსებული.
• ოთხი სხვადასხვა წყაროს ცნობით, პოლიცია სწავლობს ევროპის კოლეჯის მიერ ბრიუგეში 3.2 მილიონ ევროდ შენობის შეძენის გარემოებებს, სადაც აკადემიაში მცხოვრები დიპლომატები არიან განთავსებულები.

ჩაშლილად: ევროპის კოლეჯის სპიკერმა, რომლის რექტორიც მოგერინი 2020 წლიდან არის, განაცხადა, რომ არ იცის, დააკავეს თუ არა იგი, და კომენტარის გაკეთებაზე უარი თქვა.

• მოგერინი საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენელი 2014-2019 იყო და 2022 წლიდან არის ბრიუგეში ახალგაზრდა დიპლომატების აკადემიის დირექტორი.
• "კოლეჯის კიდევ ერთი თანამშრომელი, რომელიც აღმასრულებელი განათლების დეპარტამენტში იყო დასაქმებული, ასევე დააკავეს," – თქვა წყარომ გამოცემასთან საუბრისას.

დიდი სურათი: ასევე დაკავებულია ევროკომისიის მაღალჩინოსანი სტეფანო სანინო. სანინო ევროპის საგარეო ქმედებათა სამსახურის (EEAS) გენერალური მდივანი იყო მოგერინის დროს, იმ პერიოდში, როდესაც დიპლომატიური აკადემია შეიქმნა.

• ის ამჟამად ევროკომისიის ახლო აღმოსავლეთის, ჩრდილოეთ აფრიკისა და ყურის დეპარტამენტის გენერალური დირექტორია.
• კომისიამ დაადასტურა, რომ პოლიცია სამშაბათს იმყოფებოდა EEAS-ის შენობებში და ეს მიმდინარე გამოძიების ნაწილია, რომელიც წინა მანდატის დროს განხორციელებულ საქმიანობას ეხება.  
• "ნახევარი საათის წინ მივიღე ინფორმაცია იმის შესახებ, რაც ბრიუგეში ხდება," – განაცხადა ჰერმან ვან რომპეიმ, ევროპული საბჭოს ყოფილმა პრეზიდენტმა, რომელიც ახლა ბრიუგეში ევროპის კოლეჯის ადმინისტრაციული საბჭოს პრეზიდენტია.