ახალი ამბები

18 დეკემბერს ბრიუსელში ევროპული ქვეყნების ლიდერები გაყინული რუსული აქტივების უკრაინისთვის გადაცემაზე იმსჯელებენ.

გამოცემა Politico-ს სტატიის თანახმად, ევროპა აშშ-ს მხრიდან არნახულ ზეწოლას განიცდის. თეთრი სახლი ცდილობს გავლენა იქონიოს ევროპის პოლიტიკაზე და სულ უფრო მეტი ლიდერი, ბრიუსელის მოსაზრებებს ეწინააღმდეგება.

ჩაშლილად: ტრამპის ადმინისტრაცია უკრაინისთვის 210 მილიარდი ევროს ღირებულების რუსული აქტივების გადაცემის წინააღმდეგია და ამიტომ აშშ ევროპულ მთავრობებს გეგმაზე უარის თქმისკენ უბიძგებს.

• გაყინული აქტივების საკითხზე ბრიუსელში ევროპის ლიდერები ოქტომბერში შეხვდნენ. მაშინ შეთანხმება ვერ შედგა ბელგიის გამო, რომელიც გეგმას არ დაეთანხმა.
  
  
• ბრიუსელის თანხმობა მნიშვნელოვანია, ვინაიდან რუსული აქტივების დიდი ნაწილი ბელგიაშია.
  
  
• როგორც Politico წყაროზე დაყრდნობით წერს, მიუხედავად იმისა, რომ ევროკავშირი აქტიურად ცდილობს ბელგია დაითანხმოს, შეთანხმების შანსი კიდევ უფრო მცირეა, ვიდრე აქამდე იყო.
  
  
• ამერიკული გავლენის კამპანიამ, რომლის ფარგლებში ტრამპის მაღალჩინოსნები ბრიუსელის გვერდის ავლით, კულისებს მიღმა აწარმოებდნენ მოლაპარაკებებს, შედეგი გამოიღო - აქტივების გადაცემის წინააღმდეგები არიან იტალია, ბულგარეთი, მალტა და ჩეხეთი. 
• გერმანიის კანცლერის, ფრიდრიხ მერცის აზრით, შეთანხმების ვერ მიღწევის შემთხვევაში ევროკავშირი "მრავალი წლით მიიღებს ზიანს".
  
  
• ევროპის სახალხო პარტიის ლიდერის, მანფრედ ვებერის თქმით, "აშშ აღარ არის თავისუფალი სამყაროს ლიდერი".

ფართო ხედით: მედიაში გაჟონილი, კრემლისა და თეთრი სახლის მიერ შეთანხმებული სამშვიდობო გეგმის მიხედვით, ვაშინგტონი გაყინული აქტივების ნაწილის გამოყენებას უკრაინაში რეკონსტრუქციული სამუშაოების ჩატარების მიზნით აპირებს, ამ სამუშაოებს კი აშშ უხელმძღვანელებს. 

• ევროპის ლიდერების გეგმის მიხედვით, უკრაინა "რეპარაციულ სესხს" მიიღებს. "რეპარაციული სესხი" უპრეცენდენტო იდეაა, რომლის მიხედვით, კიევს გადაეცემა 140 მილიარდი ევროს ღირებულების, რუსული აქტივებით უზრუნველყოფილი სესხი.
• უკრაინისთვის "რეპარაციული სესხი" ბიუჯეტში გაჩენილი დიდი ხვრელის დაფარვის საუკეთესო საშუალებაა.
  
  
• ვოლოდიმირ ზელენსკიმ პრაგმატული კომენტარი გააკეთა, მისი თქმით, "სულ ერთია, რა გზით მიიღებს თანხას უკრაინა", თუმცა მიაჩნია, რომ "რუსეთმა მიყენებული ზარალი უნდა აანაზღაუროს".