ახალი ამბები

„რეალპოლიტიკას“ ევროკავშირში ერთ-ერთმა მაღალჩინოსნმა განუცხადა, რომ ევროკავშირის უმაღლესი დიპლომატები - მათ შორის კაია კალასი და წევრი ქვეყნების საგარეო საქმეთა მინისტრები - 20 ოქტომბერს, ლუქსემბურგში გამართულ სხდომაზე საქართველოს პოლიტიკური ვითარების განხილვას გეგმავენ.

ვითარების არსი: საუბარი შეეხება საქართველოში მიმდინარე გამწვავებულ პოლიტიკურ პროცესებს, მედიასა და არასამთავრობო ორგანიზაციებზე ზეწოლის შემთხვევებს, სამოქალაქო სივრცის შეზღუდვასა და ძალადობის ფაქტებს.

• სხდომა გაიმართება ევროკავშირის საგარეო საქმეთა მინისტრების საბჭოს ფარგლებში. საქართველოს საკითხთან ერთად, დღის წესრიგში იქნება უკრაინაში და ახლო აღმოსავლეთში მიმდინარე მოვლენებიც.

კულისებს მიღმა: მოსალოდნელია, რომ კაია კალასი მინისტრებთან მოხსენებას წარადგეს, სადაც საქართველოსთან მიმართებით შესაძლო სანქციების საკითხიც განიხილება.

• 4 ოქტომბრის შემდეგ საქართველოში განვითარებულმა მოვლენებმა ევროკავშირის დისკუსიებს „ახალი იმპულსი და მომენტუმი შესძინა“.
• ამასთანვე, არსებობს განწყობა, რომ მინისტრები იმსჯელებენ, როგორ უპასუხოს ევროკავშირმა საქართველოში შექმნილ ვითარებას“.
• ამ კონტექსტში, ფინეთის საგარეო საქმეთა მინისტრის მიერ გაკეთებულ განცხადებაზეც იქნება საუბარი, რაც ევროკავშირის შიგნით მზარდ შეშფოთებას ასახავს საქართველოს დემოკრატიული პროცესების შესუსტების გამო.