ახალი ამბები

მიმდინარე კვირაში თურქეთის პარლამენტში შვედეთის ნატო-ში გაწევრიანებასთან დაკავშირებით კენჭისყრა გაიმართება.

გასული წლის დეკემბერში თურქეთის პარლამენტის საგარეო საქმეთა კომიტეტმა შვედეთის ნატო-ში გაწევრიანებას მხარი დაუჭირა. პროცესის დასასრულებლად კი შვედეთის ჩრდილოატლანტიკურ ალიანში გაწევრიანების პროტოკოლი თურქეთის საკანონმდებლო ორგანოს მიერ დამტკიცება ესაჭიროება.

კონტექსტი

თურქეთის პრეზიდენტი, რეჯეფ თაიფ ერდოღანი შვედეთის ნატო-ში გაწევრიანების პროტოკოლზე ხელმოწერისგან თავს იკავებდა, რადგან სტოკჰოლმს თურქეთის მიერ ტერორისტებად გამოცხადებული ეთნიკური ქურთების მფარველობაში ადანაშაულებდა.

გარდა ამისა, ანკარას უკმაყოფილება ივნისში სტოკჰოლმის ცენტრში გამართულმა ანტი-თურქულმა და ანტი-ისლამურმა აქციებმა გამოიწვია, რომლის დროსაც დემონსტრანტებმა ყურანი დაწვეს. მიუხედავად ამისა, 23 ოქტომბერს თურქეთის პრეზიდენტმა შვედეთის ნატო-ში გაწევრიანების პროტოკოლს ხელი მოაწერა და რატიფიკაციისთვის პარლამენტს გაუგზავნა.

31 მარტს თურქეთის პარლამენტმა ფინეთის, შვედეთისგან დამოუკიდებლად, ნატო-ში გაწევრიანებას მხარი დაუჭირა. იმისთვის, რომ შვედეთი ჩრდილოატლანტიკური ალიანსს შეუერთდეს, გაფართოების პროცესს ნატო-ს აბსოლუტურად ყველა წევრმა უნდა დაუჭიროს მხარი.

ამჟამად, ჩრდილოატლანტიკური ალიანსის ერთადერთი წევრი სახელმწიფო, რომლის პარლამენტსაც შვედეთის ნატო-ში გაწევრიანების საკითხის განხილვა ამ დრომდე არ დაუწყია, უნგრეთია. გარდა იმისა, რომ უნგრეთი შვედეთის გაწევრიანების პროცესს აფერხებს, პრემიერ-მინისტრი, ვიქტორ ორბანი შვედ პოლიტიკოსებს უნგრეთის დემოკრატიულ ვითარებასთან დაკავშირებით „უხეში ტყუილის“ თქმაში ადანაშაულებს.

25 სექტემბერს უნგრეთის პარლამენტის საშემოდგომო სესიის გახსნაზე ვიქტორ ორბანმა განაცხადა, რომ მისი ქვეყანა შვედეთის ნატო-ში გაწევრიანების შესახებ განხილვის დაწყებას არ ჩქარობს, რადგან შვედეთის უსაფრთხოებას არაფერი ემუქრება.

8 ნოემბერს უნგრეთის პრეზიდენტმა, კატალინ ნოვაკმა ნატო-ს შტაბ-ბინაში ვიზიტისას განაცხადა, რომ მხარს უჭერს შვედეთის ნატო-ში გაწევრიანებას და უნგრეთის პარლამენტს „სწრაფი და გონივრული გადაწყვეტილების მიღებისკენ“ მოუწოდა.