ახალი ამბები

7 ივნისს, პოლონეთის პრემიერ-მინისტრმა მატეუშ მორავიეცკიმ პოლონურ ქარხანა Huta Stalowa Wola-ში ვიზიტის დროს, რომელიც, სხვა პროდუქციასთან ერთად, სამხედრო ტექნიკასაც აწარმოებს, უკრაინასა და პოლონეთს შორის იარაღის მიწოდების ხელშეკრულების ხელმოწერაზე განაცხადა.

ამის შესახებ პოლონეთის პრემიერ-მინისტრის ადმინისტრაციის ვებ-გვერდი იუწყება.

"ჩვენ ვაფორმებთ იარაღის ექსპორტის ერთ-ერთ ყველაზე დიდ კონტრაქტს ბოლო სამი ათწლეულის განმავლობაში. ეს არის იარაღის მიყიდვა უკრაინელებისთვის", - თქვა მორავიეცკიმ.

მან თქვა, რომ ეს არის რეკომენდირებული იარაღი, რომელიც "ძალიან მნიშვნელოვანი იქნება ბრძოლის ველზე - აღმოსავლეთ უკრაინაში", მაგრამ არ დააკონკრეტა დეტალები, არც თავად იარაღის ტიპის და არც კონტრაქტის ღირებულების შესახებ.

მორავიეცკის თქმით, უკრაინა ხელშეკრულებას ნაწილობრივ საკუთარი ბიუჯეტით დაფარავს, ნაწილობრივ კი - ევროკავშირი.

პოლონეთის პრემიერმა აღნიშნა, რომ მისი ქვეყანა შეძლებს ეს თანხები თავისი საწარმოო პოტენციალის გასაფართოებლად გამოიყენოს.