პალესტინელების 70%-ზე მეტი ამართლებს 7 ოქტომბრის ტერორისტულ თავდასხმას - კვლევა
![](https://realpolitika.ge/storage/images/cache/900x440/hamas 11111111111111.jpg)
"პალესტინის პოლიტიკისა და კვლევის ცენტრის" მიერ 20 მარტს გამოქვეყნებული ახალი კვლევა აჩვენებს, რომ ჰამასის მხარდაჭერის დონე მცირდება როგორც ღაზას სექტორში, ასევე დასავლეთ სანაპიროზე, თუმცა მათი რაოდენობა, ვინც თვლის, რომ 7 ოქტომბრის ტერორისტuli თავდასხმა "სწორი" იყო, პრაქტიკულად უცვლელია.
კვლევის თანახმად, ღაზასა და დასავლეთ სანაპიროზე პალესტინელების 71% მხარს უჭერს 7 ოქტომბრის ხოცვა-ჟლეტას, რომლის დროსაც ტერორისტებმა დაახლოებით 1200 ადამიანი მოკლეს და 253 - გაიტაცეს.
მიუხედავად იმისა, რომ საერთო მაჩვენებელი თითქმის უცვლელი დარჩა, 7 ოქტომბრის ტერორისტული თავდასხმის მხარდაჭერა ღაზაში ბოლო სამი თვის განმავლობაში 57%-დან 71%-მდე გაიზარდა და დასავლეთ სანაპიროზე 82%-დან 71%-მდე შემცირდა.
რესპონდენტებმა მაღალი შეფასება მისცეს "ჰამასის" ლიდერს ღაზაში იაჰია სინვარს - 61%. თუმცა, დეკემბერში მის საქმიანობას დადებითად 69% აფასებდა.
კვლევის ერთ-ერთი კითხვა იყო ვის მისცემდნენ ხმას პალესტინელები, თუ დღეს ახალი საპარლამენტო არჩევნები ჩატარდება: ჰამასი - 30%, ფათაჰი - 14%, არცერთი - 15%, სხვა პარტიები - 6%, ხოლო 36% აცხადებს, რომ არჩევნებში მონაწილეობას არ მიიღებს.
კვლევის ფარგლებში გამოკითხული ღაზელების 60% ამბობს, რომ მათი ოჯახის წევრი ომის დროს მოკლეს, ხოლო 68% აცხადებს, რომ მათი ოჯახის წევრი დაშავდა. გამოკითხულთა მხოლოდ 22% ამბობს, რომ მათი ოჯახის არც ერთი წევრი არ მოუკლავთ ან დაუჭრიათ.
5-10 მარტს ჩატარებული კვლევის ფარგლებში 1580 ადამიანი გამოიკითხა, მათგან 830 დასავლეთ სანაპიროზე და 750 ღაზას სექტორში.