პოლონეთის პრეზიდენტმა ვეტო დაადო მედიის შესახებ სადავო კანონს
.jpeg)
პოლონეთის პრეზიდენტმა ანჯეი დუდამ ვეტო დაადო მედიის შესახებ კანონს, რომელიც უცხოურ კომპანიებს პოლონური მედია-საშუალებების ფლობას უზღუდავდა.
ოპოზიციური ძალები აცხადებენ, რომ ხელისუფლებას ამ გზით მთავრობის მიმართ კრიტიკულად განწყობილი ტელეარხის, TVN24-ის შევიწროება სურს, რომელსაც ამერიკული მედია-ჰოლდინგი Discovery ფლობს.
პრეზიდენტმა დუდამ, რომელიც მმართველი პარტიის მხარდაჭერით სარგებლობს, განაცხადა, რომ კანონი წინააღმდეგობრივი იყო „მედია-პლურალიზმის და სიტყვის თავისუფლების თვალსაზრისით“.
პოლონეთის მთავრობის თანახმად, კანონპროექტი „მტრულად განწყობილი უცხო ქვეყნების გავლენის შესაზღუდად“ მიიღეს.
პოლონეთში აშშ-ს ელჩის მოვალეობის შემსრულებელმა დუდას ნაბიჯი მოუწონა „გამოჩენილი ლიდერობის და დემოკრატიული ღირებულებების ერთგულების გამო“.
TVN ჯგუფი, რომელიც TVN24-ს აკონტროლებს, პოლონეთის მმართველი ძალის - კანონის და სამართლიანობის პარტიის - მიმართ კრიტიკით გამოირჩევა.
ცოტა ხნის წინ კანონპროექტის გასაპროტესტებლად პოლონეთის ქალაქებში მასშტაბური დემონსტრაციები გაიმართა.
