ახალი ამბები

პორტუგალიის პრეზიდენტმა მარსელუ რებელუ დი სოუზამ განაცხადა, რომ აშშ-ის პრეზიდენტი დონალდ ტრამპი ახლა "რუსეთის აგენტის" მსგავსად მოქმედებს, რადგან უკრაინის წინააღმდეგ ომში უპირატესობას მოსკოვს ანიჭებს.

State Of Play: CNN Portugal-ის ცნობით, პრეზიდენტმა სიტყვით გამოსვლისას საერთაშორისო ვითარებასა და თანამედროვე გამოწვევებზე ისაუბრა.

• მან ტრამპი ახალი სტილის პოლიტიკური ლიდერობის მაგალითად დაასახელა - უფრო ემოციური და მოქალაქეებთან შუამავლების გარეშე პირდაპირ კონტაქტზე ორიენტირებული. ამასთანავე, მან აღნიშნა გლობალური ძალთა ბალანსში საშიში ცვლილება.
• "ერთი განსაკუთრებული და რთული რამ: წამყვანი სუპერსახელმწიფოს ლიდერი, ობიექტურად, საბჭოთა თუ რუსი აგენტია. ის როგორც აგენტი მოქმედებს," - განაცხადა პორტუგალიის პრეზიდენტმა.
• დი სოუზამ ხაზგასმით აღნიშნა, რომ ეს არ არის "მეგობრობაზე, ეკონომიკურ, იდეოლოგიურ ან დოქტრინალურ თანამშრომლობაზე დაფუძნებული ალიანსი."
• "მე ვამბობ, რომ ობიექტურად, ამერიკის ახალი ხელისუფლება სტრატეგიულად ხელს უწყობს რუსეთის ფედერაციას," - განაცხადა მან, როდესაც უკრაინის ომში აშშ-ის პრეზიდენტის ქმედებებზე საუბრობდა.

Big Picture: მისი თქმით, ახალი ადმინისტრაცია "ერთი მხარის მოკავშირიდან კონფლიქტის არბიტრად გადაიქცა," თან ისეთ არბიტრად, რომელსაც მოლაპარაკებების წარმოება მხოლოდ რუსეთთან სურს, უკრაინისა და ევროპის გარეშე.

• აშშ-ის პრეზიდენტად მეორე ვადით არჩევის შემდეგ, დონალდ ტრამპმა უკრაინა-რუსეთის კონფლიქტის მოგვარების მიზნით დიპლომატიური ძალისხმევა დაიწყო.
• შედგა რამდენიმე შეხვედრა რუსეთისა და უკრაინის დელეგაციებს შორის.
• 2025 წლის 15 აგვისტოს კი, დონალდ ტრამპმა რუსეთის ლიდერს ალასკაში უმასპინძლა და პუტინს პირადად შეხვდა. თუმცა, მხარეებმა მნიშვნელოვან პროგრესს ვერ მიაღწიეს. შეხვედრის შემდეგ რუსეთისა და უკრაინის პირველი პირების შეხვედრა დაანონსდა, თუმცა, მოგვიანებით ცხადი გახდა, რომ რუსეთის აგრესიული ქმედებების გამო, ის არ შედგებოდა.