ახალი ამბები

თეთრ სახლში დასრულდა დონალდ ტრამპისა და ვოლოდიმირ ზელენსკის ორმხრივი შეხვედრა და დაიწყო გაფართოებული მოლაპარაკება ევროპელი ლიდერების მონაწილეობით.

State Of Play: მისასალმებელ სიტყვაში დონალდ ტრამპმა უკრაინელ პრეზიდენტთან გამართული შეხვედრა „წარმატებულად“ შეაფასა და გამოთქვა იმედი, რომ ომის დასრულება უახლოესი ორი კვირის განმავლობაში შესაძლებელია.

• ამერიკელ პრეზიდენტთან გამართულ შეხვედრას "ძალიან კონსტრუქციული" უწოდა ვოლოდიმირ ზელენსკიმ და კიდევ ერთხელ მადლობა გადაუხადა დონალდ ტრამპს. 
  
  
• "იმედი მაქვს, რომ ვიპოვით გამოსავალს ყველა პრობლემურ საკითხზე, მათ შორის ტერიტორიებზეც" - განაცხდა ვოლოდიმირ ზელენსკიმ. 

Zoom In: მისასალმებელ სიტყვაში დონალდ ტრამპმა განაცხადა, რომ გაფართოებულ ფორმატში განხილვის მთავარი თემა უკრაინის უსაფრთხოების გარანტიები იქნება, თუმცა განსახილველ თემებს შორის იქნება ტერიტორიული საკითხიც.

• ამერიკელი პრეზიდენტის თქმით, უკრაინის უსაფრთხოების უზრუნველყოფის საქმეში ძირითადი როლი ევროპულმა სახელმწიფოებმა უნდა შეასრულონ. 
  
  
• დონალდ ტრამპმა კიდევ ერთხელ გაიმეორა, რომ დღევანდელი შეხვედრის წარმატების შემთხვევაში ის შეეცდება ვლადიმირ პუტინთან სამმხრივი სამიტის ორგანიზებას - მისი თქმით, რუსეთის პრეზიდენტს შეხვედრის დასრულებისთანავე დაურეკავს. 
  
  

Big Picture: მისასალმებელი გამოსვლის შემდეგ, დონალდ ტრამპმა სიტყვა ევროპელ ლიდერებს გადასცა.

რა თქვეს ევროპელმა ლიდერებმა? 

ნატოს გენერალური მდივანი, მარკ რუტე: დონალდ ტრამპისა და ვოლოდიმირ ზელენსკის გამოსვლის შემდეგ, სიტყვა მარკ რუტემ აიღო. ნატოს გენერალურმა მდივანმა დონალდ ტრამპის შეცვლილ პოზიციას უკრაინის უსაფრთხოების უზრუნველყოფაში მონაწილეობაზე „ნამდვილი გარღვევა“ უწოდა.

• მარკ რუტემ კიდევ ერთხელ გადაუხადა მადლობა ამერიკელ პრეზიდენტს პროცესის ჩიხიდან გამოვყვანისთვის. 
  
  

გერმანიის კანცლერი, ფრიდრიხ მერცი: თავისი გამოსვლა გერმანელმა კანცლერმა ცეცხლის შეწყვეტის აუცილებლობაზე ხაზგასმით დაიწყო და აღნიშნა, რომ ამისთვის ბოლო გონივრული ვადა ვლადიმირ პუტინთან მომდევნო შეხვედრაა. 

• "ჩვენ უნდა შევინარჩუნოთ წნეხი რუსეთზე, რადგან ჩვენი დღევანდელი ძალისხმევის შედეგებზე დამოკიდებული იქნება, როგორც მინიმუმ, ცეცხლის შეწყვეტის შეთანხმება. 
  
  
• მერცმა მადლობა გადაუხადა დონალდ ტრამპს, რადგანაც, მისი ძალისხმევის ფონზე გასული 3.5 წლის განმავლობაში პირველად გამოავლინმა რუსეთმა სერიოზული მოლაპარაკებების მზაობა. 

საფრანგეთის პრეზიდენტი, ემანუელ მაკრონი: ცეცხლის შეწყვეტის შეთანხმების აუცილებლობას გაუსვა ხაზი თავის გამოსვლაში ფრანგმა ლიდერმაც. გარდა ამისა, მაკრონი გამოვიდა პუტინთან სამმხრივ შეხვედრაში ევროპის მონაწილეობის ინიციატივით. 

• "ვფიქრობ, შემდეგომში ჩვენ დაგვჭირდება ოთხმრივი შეხვედრის ორგანიზება. როდესაც ჩვენ ვსაუბრობთ უკრაინის უსაფრთხოების გარანტიებზე, ვსაუბრობთ ევროპული კონტინენტის უსაფრთხოებაზეც" - განაცხადა მაკრონმა. 

ფინეთის პრეზიდენტი, ალექსანდრ სტუბი: თავის მისასალმებელ სიტყვა ფინეთის ლიდერმა ხუმრობით გახსნა და თქვა, რომ შესაძლოა ბევრს აწუხებდეს კითხვა - თუ რა საქმე აქვს პატარა ფინეთის პრეზიდენტს ასეთ მნიშვნელოვან შეხვედრაზე?

• მისი თქმით, ამის მიზეზია ფინეთისა და რუსეთის გრძელი საზღვარი, და მძიმე მოვლენებით სავსე ისტორია.
• სტუბმა ასევე აღნიშნა, რომ გასული ორი კვირის განმავლობაში დასავლეთს უფრო დიდი პროგრესი აქვს მიღწეული, ვიდრე გასული 3.5 წლის განმავლობაში, და ეს დონალდ ტრამპის ძალისხმევის შედეგია.

გაერთიანებული სამეფოს პრემიერ-მინისტრი, კირ სტარმერი: დიდი ბრიტანეთის ლიდერმა თეთრ სახლში მიმდინარე შეხვედრას პოტენციურად ისტორიული უწოდა და ხაზი გაუსვა ე.წ. მსურველთა კოალიციის როლს. 

• „ჩვენ დღეს შესაძლოა შევთანხმდეთ უკრაინის უსაფრთხოების გარანტიებზე. ეს არ არის მხოლოდ უკრაინის უსაფრთხოების გარანტიები - ეს ევროპის უსაფრთხოებასაც ეხება'.
• ბრიტანელი პრემიერის თქმით, ტრამპის მზაობა მიიღოს მონაწილეობა უკრაინისთვის ნატოს მეხუთე მუხლის მსგავსი უსაფრთხოების გარანტიებში სრულ თანხმობაში მსურველთა კოალიციის გეგმებთან.