ახალი ამბები

დონალდ ტრამპი პარასკევს თეთრ სახლში გამართული სკანდალური შეხვედრის შესახებ პრესაში გავრცელებულ კრიტიკას გამოეხმაურა. 

"ერთადერთი პრეზიდენტი, რომელსაც პუტინის რუსეთისთვის არ მიუცია უკრაინის მიწა დონალდ ტრამპია, გახსოვთ ეს, როდესაც სუსტი და არაეფექტური დემოკრატები მაკრიტიკებენ და ფეიკ ნიუსი სიხარულით ავრცელებს"- წერს ამერიკის პრეზიდენტი საკუთარ სოციალურ ქსელში. 

ცოტა ხნით ადრე ტრამპმა დაწერა, რომ ამერიკელებმა ნაკლებად უნდა იდარდონ პუტინზე და მეტად არალეგალურ მიგრაციაზე, კრიმინალებსა და დამნაშავეებსა, რათა ამერიკამ არ დაასრულოს "ევროპასავით."

2 მარტს იმავე სოციალურ ქსელში დონალდ ტრამპმა ერთ-ერთი მომხარებლის პოსტი გააზიარა, რომელშიც ნათქვამი იყო, რომ პარასკევის სკანდალური შეხვედრის შემდეგ, ვოლოდიმირ ზელენსკის არ ექნება არანაირი არჩევანი გარდა იმისა, რომ მიიღოს ტრამპის პირობები.

"უკრაინასთან მწირმიწების შეთანხმებით ტრამპი ხელს უწყობს აშშ-ს ჩართულობას უკრაინის სასარგებლო წიაღისეულის მოპოვებაში, ეს კი რუსეთის მხრიდან უკრაინაზე ახალი თავდასხმის პრევენციაა, რადგანაც ასეთ ვითარებაში უკრაინაზე თავდასხმა ამერიკელების სიცოცხლეს რისკის ქვეშ დააყენებს და აიძულებს მას უპასუხოს რუსეთის ქმედებებს",- ნათქვამია პოსტში. 

კონტექსტი 

თეთრ სახლში ვოლოდიმირ ზელენსკისა და დონალდ ტრამპის შეხვედრა ვიცე-პრეზიდენტ, ვენსთან დაწყებული კამათის შემდეგ ხმამაღალ, დაძაბულ საუბარში გადაიზარდა და საბოლოოდ სკანდალურად ჩაიშალა. 

მიზეზი ვიცე-პრეზიდენტ, ჯეიმს დევიდ ვენსის კომენტარი გახდა, რომელმაც განაცხადა, რომ პუტინი უკრაინაში შეიჭრა და გაანადგურა ქვეყნის დიდი ნაწილი, და დღეს ცხადია, რომ გასული 4 წლის განმავლობაში აშშ-ის ადმინისტრაციის მიდგომა არასწორი იყო და დიპლომატიის დრო მოვიდა.