ახალი ამბები

შეერთებული შტატების პრეზიდენტის თქმით, უკრაინა ამერიკულ შეიარაღებას ნატოს გავლით მიიღებს, მისი თქმით, ამგვარი სქემაში შეიარაღების სრულ ღირებულებას ალიანსი დაფარავს. 

State Of Play: ამის შესახებ დონალდ ტრამპმა NBC-ისთვის მიცემულ ინტერვიუში ისაუბრა - ამავე გამოსვლაში ამერიკელმა პრეზიდენტმა 14 ივლისს რუსეთის შესახებ "მნიშვნელოვანი განცხადება" დააანონსა. 

• "ჩვენ ვუგზავნით შეიარაღებას ნატოს და ნატო იხდის შეიარაღების საფასურს 100%-ით. ამგვარად ჩვენგან გაგზავნილი შეიარაღება ჯერ ნატოში მოხვდება და შემდეგ უკრაინაში"- ამბობს ამერიკელი პრეზიდენტი. 
  
  
• გამოცემა Axios ვითარებაში გაცნობიერებულ წყაროებზე დაყრდნობით წერს, რომ ახალი სქემის ფარგლებში ამერიკა შეიარაღებას ჩრდილო-ატლანტიკური ალიანსის წევრებს მიჰყიდის, რომლებიც შემდგომ ამავე შეიარაღებას უკრაინას გადასცემენ. 
  
  
• დონალდ ტრამპის თქმით, ამგვარ სქემაზე მოკავშირეები ივნისში ჰააგაში გამართულ ნატოს სამიტზე შეთანხმდნენ - იმავე Axios-ის ცნობით, ახალი სქემის ფარგლებში უკრაინამ შესაძლოა მიიღოს არამხოლოდ საჰაერო თავდაცვის სისტემები, არამედ შეტევისთვის განკუთვნილი შეიარაღებაც. 

Big Picture: ამავე ინტერვიუში ტრამპმა კიდევ ერთხელ განაცხადა, რომ იმედგაცრუებულია რუსეთის მოქმედებებით - "ვფიქრობ, ორშაბათს რუსეთის შესახებ მნიშვნელოვან განცხადებას გავავრცელებ"- ამბობს ტრამპი. 

• ახალ სქემაზე გასულ კვირებში მიანიშნებდნენ როგორც უკრაინელი, ასევე ევროპელი ლიდერებიც - ვოლოდიმირ ზელენსკი ამბობდა, რომ ნორვეგია და გერმანია მზად არიან უკრაინისთვის შტატებისთვის PATRIOT-ის ტიპის 2 სისტემა შეიძინონ. მზაობა რომში გამართულ სამიტზე დაადასტურა გერმანიის კანცლერმა, ფრიდრიხ მერცმა. 
  
  
• კუალა-ლუმპურში სერგეი ლავროვთან გამართული შეხვედრის შემდეგ უკრაინის შეიარაღების სქემაში ევროპელი პარტნიორების ჩართულობის სურვილზე ისაუბრა სახელმწიფო მდივანმა, მარკო რუბიომაც - "კარგი იქნებოდა, თუ ის ქვეყნები, რომლებმაც PATRIOT-ები შეუკვეთეს დათანხმდებოდნენ დანადგარების უკრაინაში გაგზავნას." 
  
  
• ამავე გამოსვლაში რუბიომ განაცხადა, რომ ლავროვისგან კონფლიქტის დარეგულირების შესახებ "ახალი იდეები მოისმინა, რომელსაც პრეზიდენტთან განიხილავს."

Сontext: Reuters საკუთარ წყაროებზე დაყრდნობით წერს, რომ უახლოეს დღეებში ტრამპი პირველად გამოიყენებს საპრეზიდენტო ძალაუფლებას უკრაინისთვის შეიარაღების ახალი პაკეტის გადასაცემად - აქამდე უკრაინა მხოლოდ ბაიდენის ადმინისტრაციის დროს დამტკიცებულ შეიარაღებას იღებდა. 

• წყაროების ცნობით, ახალი პაკეტის ფარგლებში უკრაინამ შესაძლოა 300 მილიონი დოლარის შეიარაღება მიიღოს, როგორც თავდაცვითი, ასევე შეტევისთვის განკუთვნილი. 
  
  
• "როგორც ჩანს პრეზიდენტმა ტრამპმა გაიაზრა, რომ რუსეთთან ურთიერთობების გადატვირთვა შეუძლებელია"- წერს СNN. 
  
  
• "პუტინმა მძიმე შეცდომა დაუშვა, როდესაც არაერთხელ უარყო ტრამპის სამშვიდობო წინადადებები, რამაც პოტენციური მოკავშირიდან რუსეთის სკეპტიკოსად გარდაქმნა"- წერს New York Times.