ახალი ამბები

უკრაინელ სამხედროებს ზაპორიჟიეს რეგიონში, ნოვოდანილოვკა-ვერბოვეს მიმართულებით წინსვლა აქვთ და მიღწეულ ხაზებზე გამაგრდნენ.

ამ ინფორმაციას უკრაინის შეიარაღებული ძალების გენერალური შტაბი ავრცელებს.

"ნოვოდანილოვკა-ვერბოვეს მიმართულებით წარმატება გვქონდა, მიღწეულ ხაზებზე გამაგრებას ვიწყებთ, მტრის იდენტიფიცირებულ სამიზნეებს არტილერიით ვბომბავთ და ვიღებთ კონტრ-ბატარეულ ზომებს.

ბახმუტის მიმართულებით თავდაცვის ძალები აგრძელებენ შეტევითი ოპერაციების ჩატარებას ქალაქ ბახმუტის სამხრეთით და გამაგრებული არიან მიღწეულ ხაზებზე." - ვკითხულობთ განცხადებაში.

ამასთანავე, უკრაინული მხარის ცნობით, რუსებმა წარუმატებელი შეტევითი ოპერაციები ჩაატარეს დონეცკის ოლქის ავდიივკასა და მარინკას რაიონებში.

გენერალური შტაბი აცხადებს, რომ მტერს მნიშვნელოვანი დანაკარგები აქვს პერსონალში, იარაღსა და აღჭურვილობაში და აქტიურად იყენებს რეზერვებს.

ასევე, უკრაინის თავდაცვის ძალები აგრძელებენ რუსული ჯარების შეტევის შეკავებას კუპიანსკის, ლიმანისა და ბახმუტის მიმართულებით.