ახალი ამბები

საერთაშორისო ორგანიზაცია "რეპორტიორები საზღვრებს გარეშე" (RSF) და მედიის, ინფორმაციისა და სოციალური კვლევების ცენტრი (CMIS) ერთობლივად აცხადებენ, რომ ბოლო ერთი წლის განმავლობაში საქართველოში პრესის თავისუფლების დარღვევებმა უპრეცედენტო მასშტაბს მიაღწია.

ვითარების არსი: 2024 წლის ოქტომბრიდან 2025 წლის ოქტომბრამდე დაფიქსირდა 600-მდე თავდასხმა პრესის წარმომადგენლებზე, რაც მოიცავს ფიზიკურ ძალადობას, უკანონო დაკავებებს, ჯარიმებსა და მუქარებს.

• RSF გმობს ხელისუფლების მიერ დამოუკიდებელი ჟურნალისტიკის მიზანმიმართულ დაშინებასა და კრიმინალიზაციას, მოუწოდებს, დაუყოვნებლივ შეწყდეს ავტორიტარული ტენდენციები. ორგანიზაციის შეფასებით, საქართველო ამჟამად "ფეხქვეშ თელავს პრესის თავისუფლებას, კანონის უზენაესობასა და პლურალიზმს."
• განცხადებაში საუბარია პრესის თავისუფლების მდგომარეობის მკვეთრად გაუარესებაზე 2024 წლის 28 ნოემბერს, პროევროპული აქციების დაწყების შემდეგ, როდესაც პრემიერ-მინისტრმა ირაკლი კობახიძემ ევროკავშირთან გაწევრიანების მოლაპარაკებების შეჩერება გამოაცხადა.
• "რეპორტიორები საზღვრებს გარეშე" აღნიშნავს, რომ ჟურნალისტები, რომლებიც აქციებს აშუქებდნენ, უმკაცრეს ზომებით დაისაჯნენ. მაგალითად, "TV პირველის" ჟურნალისტი გიორგი მამნიაშვილი დემონსტრაციის გაშუქების შემდეგ დააკავეს და, მისი ადვოკატის ცნობით, პოლიციის განყოფილებაში დამამცირებელი მოპყრობის მსხვერპლი გახდა.
• ორგანიზაციის ცნობით, ყველაზე ხშირად ძალადობის სამიზნე იყო "TV პირველი" (80-ზე მეტი თავდასხმა) და ონლაინ გამოცემები "პუბლიკა" და "ბათუმელები".

ჩაშლილად: "რეპორტიორები საზღვრებს გარეშე" (RSF) და მედიის, ინფორმაციისა და სოციალური კვლევების ცენტრი (CMIS) ხაზს უსვამენ ხელისუფლების მიერ კანონების რუსული სტილით გამკაცრებას, მათ შორის "უცხოელი აგენტების" კანონის ახალ ვერსიას და ცვლილებებს მაუწყებლობის შესახებ, რაც პირდაპირ საფრთხეს უქმნის მედიას.

• ორგანიზაციებმა გამოყვეს ბიძინა ივანიშვილის როლი საქართველოს დემოკრატიულ უკუსვლაში. RSF-მა ივანიშვილი "პრესის თავისუფლების მტაცებელთა" შორის დაასახელა, რომელიც გადამწყვეტ როლს თამაშობს პოლიტიკური ზეწოლის გაძლიერებასა და დაუსჯელობის კლიმატის გაღვივებაში.
• ბოლო ორ წელიწადში RSF-ის მსოფლიო პრესის თავისუფლების ინდექსში საქართველოს პოზიცია 37 ადგილით გაუარესდა (114-ე ადგილამდე).

დიდი სურათი: RSF მოითხოვს, რომ დაუყოვნებლივ გამოიძიონ ყველა კანონდარღვევა და აღდგეს მედიისთვის შეჩერებული აკრედიტაციები.