ახალი ამბები

4 მაისს ზაპოროჟიეში მარიუპოლიდან ევაკუირებულია 344 ადამიანი. ამის შესახებ ტელეგრამში 4 მაისს საღამოს უკრაინის ვიცე-პრემიერმა და მინისტრმა დროებით ოკუპირებული ტერიტორიების რეინტეგრაციის საკითხებში ირინა ვერეშჩუკმა განაცხადა.

"მარიუპოლის ჰუმანიტარული დერეფნის ფარგლებში დღეს 344 ადამიანის ევაკუაცია განხორციელდა, ესენი არიან ქალები, ბავშვები და მოხუცები მარიუპოლიდან, მანგუშიდან, ბერდიანსკიდან, ტოკმაკიდან და ვასილივკადან. ყველა მათგანი ახლახან ჩავიდა ზაპოროჟიეში. ჩვენთვის ეს კიდევ ერთი პატარა გამარჯვებაა", - წერს ვერეშჩუკი.

მან მადლობა გადაუხადა გაეროს თანამშრომლებს და წითელი ჯვრის საერთაშორისო კომიტეტს.

"მადლობა ჰუმანიტარული კოლონის პერსონალს: მძღოლებსა და სახელმწიფო საგანგებო სიტუაციების სამსახურის თანამშრომლებს. მარიუპოლის ჰუმანიტარული ოპერაცია გრძელდება", - განაცხადა მან.