ახალი ამბები

ამერიკის შეერთებულ შტატების მოსახლეობაში 1 თვის წინ ჩატარებულ კვლევებთან შედარებით ისრაელის მხარდამჭერთა რიცხვი შემცირდა, უმრავლესობა მხარს უჭერს ცეცხლის შეწყვეტას. 

ამის შესახებ Reuters-ის მიერ Ipsos-ისთვის დაკვეთილი კვლევის შედეგებიდან ხდება ცნობილი. 

კვლევა, რომლის ფარგლებშიც ათასზე მეტი ამერიკელი გამოკითხეს და რომელიც 14 ნოემბერს დაიხურა აჩვენებს, რომ აშშ-ს მიერ ისრაელის მხარდაჭერის გაგრძელებას 32% ემხრობა, რაც 9%-ით უფრო ნაკლებია, ვიდრე 12 ოქტომბერს ჩატარებული კვლევის დროს. 

პარალელურად 27%-დან 39%-მდე გაიზარდა იმ ამერიკელების რიცხვი, რომლებიც მიიჩნევენ, რომ მათი ქვეყანა მიმდინარე კონფლიქტში ნეიტრალური უნდა იყოს. 

კონტექსტი

კვლევა შედეგები ნაწილობრივ ასახულია პოლიტიკოსთა რიტორიკაში - გასულ კვირებში ისრაელის ავიაციის მიერ ღაზის სექტორის მასობრივი დაბომბვების შედეგად დემოკრატიული პარტიის ლიდერების ისრაელის მხარდამჭერი განცხადებების ტონი შესამჩნევად შერბილდა. 

კვლევის მიხედვით, გამოკითხულთა 68% ცეცხლის შეწყვეტას უჭერს მხარს. საყურადღებოა ისიც, რომ ცეცხლის შეწყვეტას მხარს უჭერს რესპუბიკური პარტიის მხარდამჭერთა ნახევარი და დემოკრატიული პარტიის მომხრეთა დაახლოებით 67%. 

ცეცხლის შეწყვეტისა, თუ ჰუმანიტარულ პაუზების მოწოდებები ისმის აშშ-ს პოლიტიკური ხელმძღვანელობისგან, თუმცა მძევალთა გათავისუფლების გარეშე ისრაელის მთავრობა გამორიცხავს მნიშვნელოვან ცვლილებებს ოპერაციის მსვლელობაში. 

ისრაელის მთავრობისთვის შესაძლოა განსაკუთრებით საყურადღებო იყოს ის, რომ გამოკითხულთა მხოლოდ 32% ემხრობა აშშ-ს მიერ ისრაელისთვის შეიარაღების გაგზავნას, ხოლო 43% წინააღმდეგია. შედარებისთვის უკრაინისთვის შეიარაღების გაგზავნის მომხრეთა რიცხვი ბოლო მონაცემებით 41%-ია. 

ისრაელზე მზარდი პოლიტიკური წნეხის შესახებ განაცხადა ცოტა ხნის წინ ქვეყნის საგარეო უწყების ხელმძღვანელმა, ელი კოენმა - "ღაზაში მიმდინარე ოპერაციისთვის დიპლომატიური ფანჯარა 2-3 კვირაა, ამის შემდეგ პარტნიორების წნეხი გაიზრდება."