ახალი ამბები

ირანი რუსეთს მის ტერიტორიაზე დრონების ქარხნის ასაშენებლად მასალებს აწვდის. ამ ინფორმაციას აშშ-ის ეროვნული უშიშროების საბჭოს წარმომადგენელი ჯონ კირბი დაზვერვის მონაცემებზე დაყრდნობით ავრცელებს.

აშშ-ის დაზვერვის წარმომადგენლები თვლიან, რომ ქარხანა რუსეთის ალაბუგას სპეციალურ ეკონომიკურ ზონაში, მოსკოვის სამხრეთით, მომავალი წლის დასაწყისში შეიძლება ამოქმედდეს.

დეკემბერში პრეზიდენტ ჯო ბაიდენის ადმინისტრაციამ საჯაროდ განაცხადა, რომ თეირანი და მოსკოვი განიხილავდნენ რუსეთში უკრაინის ომისთვის დრონების შეგროვების პუნქტის შექმნას. ახალი სადაზვერვო მონაცემებით, თათარსტანის იელაბუგას რეგიონში პროექტი გასცდა ამ კონცეფციას.

ამერიკელმა ოფიციალურმა პირებმა ასევე დაადგინეს, რომ ირანი აგრძელებს რუსი სამხედროებისთვის საკუთარი კამიკაძე დრონების მიწოდებას. ისინი კასპიის ზღვის გავლით, ამირაბადიდან მახაჩკალაში გადააქვთ, შემდეგ კი რუსეთის ფედერაცია უკრაინის წინააღმდეგ ომში იყენებს.

თეთრი სახლის ცნობით, მაისის მდგომარეობით, რუსეთმა ირანიდან ასეულობით ასეთი უპილოტო საფრენი აპარატი, ასევე მათ წარმოებასთან დაკავშირებული აღჭურვილობა მიიღო.

კირბიმ ამას უწოდა "სრულფასოვანი თავდაცვითი პარტნიორობა, რომელიც აზიანებს უკრაინას, ირანის მეზობლებს და საერთაშორისო საზოგადოებას."