ახალი ამბები

ჯო ბაიდენის ადმინისტრაცია უკრაინისთვის კასეტური საბრძოლო მასალით აღჭურვილი შორი დისტანციის რაკეტების გადაცემის შესახებ გადაწყვეტილების მიღებასთან ახლოსაა.

ამის შესახებ 11 სექტემბერს Reuters-ს ოთხმა ამერიკელმა ოფიციალურმა პირმა განუცხადა.

გამოცემის წყაროების თქმით, კასეტური საბრძოლო მასალის წარმატების ნახვის შემდეგ, შეერთებულმა შტატებმა უკრაინისთვის კასეტური საბრძოლო მასალით აღჭურვილი ATACMS-ის რაკეტების მიწოდების განხილვა დაიწყო, რომელსაც 306 კმ-მდე ფრენა შეუძლია.

დამტკიცების შემთხვევაში, რაკეტები უკრაინისთვის სწრაფად გადასაცემად მზად იქნება.

Reuters-ის ცნობით, ამჟამად უკრაინა შეიარაღებულია 155 მმ-იანი არტილერიით, რომლის ჭურვების მაქსიმალური სროლის მანძილიც 29 კმ-ია და რომლებსაც 48 კასეტური ფრაგმენტის გადატანა შეუძლიათ.

ასევე სარაკეტო სისტემებს, რომლებიც GMLRS რაკეტებებს 80 კმ მანძილზე ისვრიან და 300-ზე მეტი კასეტური ფრაგმენტი აქვთ შიგთავსში.

თუ უკრაინა ATACMS-ის რაკეტებს მიიღებს, მათი მოქმედების მაქსიმალური დიაპაზონი 300 კმ-ზე მეტია და ამ ტიპის რაკეტას 404-მდე კასეტური ფრაგმენტი გადააქვს.

ორმა წყარომ გამოცემას განუცხადა, რომ რადგან უკრაინის ბრძოლა რუსეთთან პროგრესის ნიშნებს ავლენს, ბაიდენის ადმინისტრაცია ცდილობს უკრაინის შეიარაღებული ძალები გააძლიეროს.