ახალი ამბები

აშშ-ის სახელმწიფო დეპარტამენტმა უკრაინისთვის 825 მილიონ დოლარამდე ღირებულების საავიაციო საბრძოლო მასალისა და აღჭურვილობის, მათ შორის 3350-მდე Extended Range Attack Munition (ERAM) საჰაერო რაკეტის, მიყიდვის ნებართვა გასცა.

State Of Play: ეს ინფორმაცია 28 აგვისტოს, თავდაცვის უსაფრთხოების თანამშრომლობის სააგენტომ (DSCA) გაავრცცელა, რომელიც აშშ-ის თავდაცვის სამინისტროს სტრუქტურებში შედის.

• სააგენტომ უკვე გასცა საჭირო სერტიფიკატები და ოფიციალურად გაუგზავნა აშშ-ის კონგრესს შეტყობინება შესაძლო შეთანხმების შესახებ.
• ERAM-ის რაკეტების გარდა, კიევმა მოითხოვა ამდენივე GPS/INS სანავიგაციო სისტემა სიგნალის დახშობისგან დაცვით, სათადარიგო ნაწილები და პროგრამული უზრუნველყოფა.
• შეთანხმების საერთო ღირებულება სავარაუდოდ 825 მილიონი დოლარია.
• შესყიდვას დანია, ნიდერლანდები და ნორვეგია, ასევე ამერიკული სამხედრო დაკრედიტების პროგრამა Foreign Military Financing დააფინანსებს.

Big Picture: გამოცემა The Wall Street Journal ადრე წყაროებზე დაყრდნობით წერდა, რომ შეთანხმება აშშ-ის პრეზიდენტის დონალდ ტრამპის ადმინისტრაციამ დაამტკიცა.

• შორ მანძილზე მოქმედი ERAM-ის რაკეტები "ჰაერი-მიწა" კლასს მიეკუთვნება.
• ამ რაკეტების მოდულური კონსტრუქცია საშუალებას იძლევა, რომ ის როგორც სახმელეთო, ასევე საზღვაო სამიზნეების დასაზიანებლად გამოიყენო.
• გამოცემა იხსენებს, რომ 2023 წელს, ჯო ბაიდენის ადმინისტრაციამ უკრაინისთვის ATACMS-ის რაკეტების გადაცემის ნებართვა გასცა. რუსეთის ტერიტორიაზე თავდასხმებისთვის მათ გამოყენებაზე დაწესებული შეზღუდვები კი 2024 წლის შემოდგომაზე მოიხსნა.
• ბოლო ATACMS-ის რაკეტები უკრაინაში მიმდინარე წლის გაზაფხულზე ჩავიდა. ახლა კიევს მათი მცირე მარაგიღა დარჩა.
• სწორედ ბაიდენის ადმინისტრაციის დროს დაიწყო ERAM-ის შექმნა - მიზანი იყო შექმნილიყო მასიური, უნივერსალური და იაფი იარაღი შორ მანძილზე სამიზნეების დასაზიანებლად.
• ERAM ფრთოსანი რაკეტისა და მფრინავი საავიაციო ბომბის ჰიბრიდია. რაკეტას 400 კმ-მდე მანძილზე შეუძლია სამიზნის დაზიანება.