ახალი ამბები

რუსეთმა უკრაინასთან ომში 5000-ზე მეტი ჯავშანმანქანა დაკარგა, ნაწილობრივ იმის გამო, რომ მათ ვერ შექმნეს ტექნიკის დაცვის ეფექტური სისტემები. ამის შესახებ ბრიტანეთის სამხედრო დაზვერვის რეზიუმეში ვკითხულობთ, რომელიც ბრიტანეთის თავდაცვის სამინისტრომ 3 მარტს Twitter-ზე გამოაქვეყნა.

მიმოხილვაში ნათქვამია, რომ უკრაინაში სრულმასშტაბიანი ომის მიუხედავად, რუსული თავდაცვის კომპანიები აგრძელებენ თავიანთი პროდუქციის გამოფენას იარაღის საერთაშორისო გამოფენებზე.

ერთ-ერთმა კომპანიამ ჯავშანტექნიკის აქტიური დაცვის კომპლექსის, Arena-E-ს პრეზენტაცია გააკეთა.  

მის სარეკლამო ბროშურაში ნათქვამია, რომ ის "გადალახავს ყველაზე საშიშ საფრთხეებს ჯავშანტექნიკისთვის" და "თუ აფასებთ თქვენს ჯავშანსა და ეკიპაჟებს, გჭირდებათ Arena-E", - ციტირებს ბრიტანული დაზვერვა.

მოხსენებაში ხაზგასმულია, რომ ჯერჯერობით უკრაინაში ომის მიმდინარეობისას, არცერთი ტექნიკის სახეობა არ აღმოჩენილა, რომელზეც Arena-E-ს სისტემა იყო დაყენებული.

ბრიტანული დაზვერვის თანახმად, 2022 წლის 24 თებერვლიდან, რუსეთის ფედერაციამ უკვე 5 ათასზე მეტი ჯავშანმანქანა დაკარგა.

"ეს, ალბათ, გამოწვეულია რუსეთის ინდუსტრიის უუნარობით, ფართო მასშტაბით აწარმოოს მაღალტექნოლოგიური სისტემები; ეს პრობლემა კიდევ უფრო გამწვავებულია საერთაშორისო სანქციების ეფექტით", - აღნიშნავს ბრიტანული დაზვერვა.