დუმის დეპუტატი დელიმხანოვი: მარიუპოლის განადგურების ოპერაცია დასრულებულია
რუსეთის სახელმწიფო დუმის დეპუტატი ჩეჩნეთის ავტონომიური რესპუბლიკიდან, ადამ დელიმხანოვი ამბობს, რომ რუსული დანაყოფები მთლიანად აკონტროლებენ ქალაქ მარიუპოლს.
რამზან კადიროვთან დაახლოებული დელიმხანოვი რუსული მედიის ცნობით, მარიუპოლში საბრძოლო მოქმედებებში მონაწილეობს.
"მარიუპოლის განადგურებისა და გაწმენდის სპეცოპერაცია ამ წუთის მდგომარეობით შეიძლება ითქვას დასრულებულია. პრეზიდენტ ვლადიმირ პუტინის ბრძანება შესრულებულია",- ამბობს დელიმხანოვი, რამზან კადიროვის ტელეგრამ არხზე გამოქვეყნებულ ვიდეომიმართვაში.
_____________________________________________
სახელმწიფო დეპარტამენტში გამართულ ბრიფინგზე გამოეხმაურნენ რუსეთის პოლიტიკური და სამხედრო ხელმძღვანელობის მტკიცების იმის შესახებ, რომ რუსეთის შეიარაღებულმა ძალებმა მარიუპოლი სრულად დაიკავეს.
სახელმწიფო დეპარტამენტის პრესსპიკერის ნედ პრაისის თქმით - "ეს არის კიდევ ერთი დეზინფორმაცია რუსეთის კარგად ნაცნობი სახელმძღვანელოდან".
პრაისის თქმით, მარიუპოლში ყალბი გამარჯვების მტკიცებით, პუტინი ცდილობს ყურადღება გადაიტანოს თავისი შეიარაღებული ძალების ჩავარდნისგან, რომელმაც ვერ მიაღწია ვერცერთ ძირითად დასახულ მიზანს.
ნედ პრაისის თქმით, უკრაინული ძალები კვლავაც აკონტროლებენ მარიუპოლის ზოგიერთ უბანს. "უკრაინელების გასაოცარი სიმამაცე და ბრძოლისუნარიანობა მარიუპოლში ქმნის საოცარ კონტრასტს იმ სულისკვეთებასთან, რაც ჩვენ რუსეთის არმიის რიგებში ვიხილეთ".
ამავდროულად ნედ პრაისმა კიდევ ერთხეულ მოუწოდა რუსეთს უზრუნველყონ ჰუმანიტარული კორიდორების ეფექტური ამუშავება მარიუპოლის ტერიტორიაზე, რათა მშვიდობიან მოსახლეობას მიეცეს ქალაქიდან გასვლის საშუალება.
ქალაქი მარიუპოლი პირველი მარტიდან მოყოლებული პრაქტიკულად სრულ ალყაშია. ამ დრომდე ქალაქს მოხალისეობრივი ბატალიონი აზოვი და უკრაინის შეიარაღებული ძალების 36-ე ბრიგადა იცავს.
მძიმე დანაკარგების მიუხედავად, უკრაინის შეიარაღებული ძალები ამ დრომდე ინარჩუნებენ კონტროლს ქალაქის რამდენიმე უბანზე, მათ შორის ერთ-ერთი აზოვსტალის მსხვილი საწარმო, რომელიც ქალაქის პორტთან ახლოს მდებარეობს.
