ახალი ამბები

ფრონტის ხაზიდან გავრცელებული და ნაწილობრივ უკვე დადასტურებული ცნობების მიხედვით, გასული 24 საათი მიმდინარე იერიშის ფარგლებში უკრაინისთვის ყველაზე ნაყოფიერი დღე იყო. 

რამდენიმე საათის წინ დადასტურდა ცნობები ЗСУ-ს მიერ დონეცკის ოლქში დასახლება ბლაჰოდატნოეს გათავისუფლების შესახებ. სავაურადოა, რომ უკრაინულმა დანაყოფებმა დაიბრუნეს კიდევ 2 დასახლება. 

გასული 24 საათის განმავლობაში შეიცვალა Z-ბლოგერების რიტორიკა, მათი ნაწილი რუსული დანაყოფების მიერ "უფრო მომგებიანი პოზიციების დაკავებასა და გადაჯგუფებაზე" ალაპარაკდა. სავარაუდოა, რომ ყველაზე დიდი პროგრესი უკრაინას დასახლება ველიკა ნოვოსილკასთან აქვს. 

ყოველდღიურ ბრიფინგზე რუსეთის თავდაცვის სამინისტრომ განაცხადა, რომ შავი ზღვის ფლოტის გემმა, წარმატებით მოიგერია უკრაინის საზღვაო დრონების თავდასხმა. 

დილის საათებში გავრცელდა უკრაინის სამხედრო დაზვერვის დირექტორის, კირილო ბუდანოვის ვიდეო-რგოლი, რომელშიც ბუდანოვი ჩუმად არის. რგოლს თან ახლდა წარწერა - "საიდუმლო გეგმებს სიჩუმე უყვართ."

აფეთქება განხორციელდა ოკუპირებულ ბერდიანსკის მახლობლად სოფელ იაკიმივკას სარკინიგზო კვანძზე. უკრაინული გამოცემა Цензор-ის ცნობით, აფეთქება უკრაინელმა პარტიზანებმა მოაწყვეს. სწორედ ამ კვანძის გავლით მარაგდებოდა ზაპორიჟიაში მოქმედი რუსული დანაყოფები ანტი-საჰერო სისტემებით და საზენიტო რაკეტებით.

დეტალები 

Bloomberg-თან უკრაინის მიმდინარე კონტრიერიშზე საუბრისას დაზვერვის ევროპელი მაღალჩინოსანი ამბობს, რომ ჯერ კიდევ უცნობია ზაპორიჟიაში განვითარებული შეტევები წარმოადგენს თუ არა უკრაინის ძირითად დარტყმას. მაღალჩინოსანის თქმით, ЗСУ-ს სამხრეთში საგრძნობი წინსვლა აქვს, თუმცა ჯავშატექნიკის დანარგებიც არსებითია. 

Telegraph-ის ცნობით, უკრაინული დანაყოფები ჯერ კიდევ ნიადაგის სინჯავენ და თავდაცვის ხაზებში სუსტი წერტილის აღმოჩენის შემთხვევაში უკრაინის სწრაფ და მძლავრ დარტყმას უნდა ველოდოთ. 

გამოცემის სამხედრო მიმომხილველი ხაზს უსვამს უკრაინის შეიარაღებული ძალების ტაქტიკურ მოქნილობას, რასაც ის არმიის დასავლურ სტანდარტზე გადასვლას უკავშირებს. მისი თქმით, უკრაინის კონტრიერიშის წარმატების მთავარი წინაპირობა არა გენერალური შტაბი, არამედ სწორედ უმცროსი ოფიცრების მოქნილობა და მათი მოქმედების ავტონომია იქნება. 

• უკრაინის D-DAY - სად და როგორ შეიძლება განვითარდეს უკრაინის კონტრიერიში

Politico-ს ცნობით, უკრაინის წარმატებული კონტრიერიში ჯო ბაიდენისთვის წინასაარჩევნო პერიოდში კიდევ ერთი საგარეო გამარჯვება იქნებოდა, რაც მის კამპანიას დაეხმარებოდა. გამოცემის მიერ მომზადებულ მასალაში აღნიშნულია, რომ აშშ-ს ჯერ არ გამოუხატავს პოზიცია უკრაინისთვის უსაფრთხოების გარანტიის საკითხზე, ასევე უცნობია გადასცემს თუ არა ვაშინგტონი კიევს საკუთარ თვითმფრინავებს. 

რა ხდება 

ზაპორიჟიის ფრონტი - მთავარი ბრძოლები გასული 24 საათის განმავლობაში ზაპორიჟიისა და დონეცკის ოლქის საზღვარზე, კამინკა, ვუჰლედარი, ლობკოვეს შემოგარენში განვითარდა. 

რუსეთის თავდაცვის სამინისტროსთან დაკავშირებული ტელეგრამ არხი Рыбарь წერს, რომ ყველაზე წარმატებულად უკრაინული დაჯგუფებები დასახლება ველიკა ნოვოსილკასთან მოქმედებენ. 

ეს რაიონი ასევე ცნობილია ვრემიევსკის შვერილის სახელით. Рыбарь-ის ცნობით, 10 ივნისს ЗСУ-ს შეტევები გააქტიურდა და მათ სოფელ ურაჟაინომდე წაიწიეს. ფლანგიდან ЗСУ-ს დანაყოფები დასახლება ნოვოდონეცკოესთან ცდილობენ მიახლოებას. 

"უშუალოდ შვერილზე უკრაინელებმა პრაქტიკულად უბრძოლველად დაიკავეს დასახლებები ბლაჰოდატნოე და ნესკუჩნოე",- ნათქვამია შეტყობინებაში. Z-ბლოგერების ცნობით, ამ მონაკვეთზე ЗСУ-ს წინსვლის შემდეგ რუსული დანაყოფების ალყაში მოქცევის საფრთხე არსებობდა და სწორედ ამით იყო განპირობებული მათი უკან დახევა. 

ანალიტიკური პორტალის Deep State-ის ცნობით, უკრაინელები წინ მიიწევენ რობოტინე და ვერბოვას მიმართულებით. ბრძოლები კვლავ გრძელდება რივნოპილია-მაკარივკის ხაზზე. ამავე პორტალის ცნობით, რუსები ნოვოდონეცკოეში გამაგრდნენ და კერმინჩიკიდან დამატებითი ძალები გადაისროლეს. 

დონეცკის ფრონტი - ბრძოლები გრძელდება ქალაქ დონეცკიდან 2 კილომეტრის დაშორებით მდებარე, სტრატეგიული მნიშვნელობის მქონე დასახლება ავდიივკაში. გასული 24 საათის განმავლობაში ამ მონაკვეთზე ფრონტის ხაზი არ შეცვლილა. 

ერთ-ერთი რუსი Z-ბლოგერის, სიმიონ პეგოვის ცნობით, გასული 24 საათის განმავლობაში რუსულმა დანაყოფებმა ავდიივკის მიმართულებით შეტევა წამოიწყეს, თუმცა მათი მცდელობა წარუმატებელი აღმოჩნდა. 

პირველად დიდი ხნის განმავლობაში მარიინკაში უცხოელი ჟურნალისტები შეუშვეს, რაც იმაზე მიანიშნებს, რომ ოკუპანტები კვლავ ვერ ახერხებენ, დასახლების დაკავებას, რასაც უკვე 16-ე ცდილობენ. 

ბახმუტის ფრონტი - ამ მონაკვეთზე კვლავ გაგრძელდა უკრაინის შეტევები, რომელიც ძირითადად კლიშიივკასა და ბერხივკის წყალსაცავის მიმართულებით მიმდინარეობს. 

იმავე Deep State-ის ცნობით, უკრაინული დანაყოფების მოქმედებები ნაწილობრივ წარმატებულია. გავრცელდა ცნობები რუსეთის მიერ ფრონტის ამ მონაკვეთზე დამატებითი რეზერვების გადასროლის შესახებაც. 

სიმიონ პეგოვის თქმით, რუსეთი რეგულარული არმიის დანაყოფების კიდევ ერთი წარუმატებელი შეტევა სწორედ ბახმუტის შემოგარენში განვითარდა. 

კონტექსტი 

საერთაშორისო პოლიტიკის კვლევის ინსტიტუტის სამხედრო ანალიტიკოსი, რობ ლი ყურადღებას ამახვილებს უკრაინული დანაყოფების წინსვლაზე ზაპორიჟიისა და დონეცკის ოლქის საზღავრზე. ლის ცნობით, რუსეთის თავდაცვის ძირითადი ხაზები ამ რაიონში სოფელ ურაჟაინოდან საკმაოდ შორს მდებარეობს, თუმცა ამ ხაზის დაძლევა უკრაინას არსებით ოპერაციულ სივრცეს გაუხსნის. 

უკრაინის სამხრეთში განვითარებულ ბრძოლებს ეხმაურება პოლკ აზოვის ერთ-ერთი მეთაური, მაქსიმ ჟორინი, რომლის დანაყოფიც ამ დროისთვის ბახმუტის შემოგარენში იბრძვის. ჟორინის თქმით, განვითარებული ბრძოლები დიდი გეგმის მხოლოდ მცირე ნაწილია. 

"ზოგადად გეგმებზე საუბარი სამხედროების საქმე არ არის, მაგრამ მინდა ვურჩიო რუსეთის გულშემატკივრებს ყირიმში - სასწრაფოდ დაიწყონ ევაკუაცია. ეს აშკარაა - ადრე, თუ გვიან ჩვენ მოვალთ და არაკომფორტულ კითხვებს დაგისვამთ",- წერს ჟორინი. 

გასული 24 საათის ბრძოლების აფასებს როსგვარდიის მეთაურის მოადგილე ე.წ. ДНР-ში, ალექსანდრ ხოდაკოვსკი. "ეს ძირითადი დარტყმის მიმართულების გადატანას ჰგავს - ზაპორიჟიის ცენტრიდან, დონეცკისა და ზაპორიჟიის მიჯნაზე, ისევ ვუჰლედარის რაიონში, დონეცკისა და მარიუპოლის დამაკავშირებელი მაგისტრალის მიმართულებით",- წერს ხოდაკოვსკი. 

ხოდაკოვსკის თქმით, წვიმით გამოწვეული პაუზით უკრაინელებმა ისარგებლეს და მისი აზრით გულაიპოლეს მიმართულებით გადაიწიეს. 

ზაპორიჟიის იმ ნაწილში, სადაც მთავარი საბრძოლო მოქმედებები მიმდინარეობდა ბოლო საათებში რამდენიმეჯერ იწვიმა. ამინდის პროგნოზის მიხედვით, პერიოდული წვიმები 15 ივნისამდე გაგრძელდება. ეს არ არის კარგი მძიმე ტექნიკის მოძრაობისთვის, თუმცა წვიმაში რუსების ვერ ისარგებლებენ საჰაერო უპირატესობით.

Deep State-ის ცნობით, Z-ბლოგერები კვლავ 4-6 დღის წინ გადაღებულ კადრებს ავრცელებენ და ცდილობენ დაზიანებული ჯავშანტექნიკის კადრების გავრცელებით უკრაინელთა სულისკვეთება გატეხონ. 

"უკვე ბევრი კარგი ამბავია, რომლის გაზიარებაც დროს მოითხოვს. ამწამს კი 47-ე ბრიგადას ჩვენი მხარდაჭერა სჭირდება"- ნათქვამია პორტალის შეტყობინებაში. 

საყურადღებოა, რომ სწორედ 47-ე ბრიგადა აწარმოებს ძირითად საომარ მოქმედებებს ქალაქ ტოკმაკის ირგვლივ.