ახალი ამბები

ულტრამემარჯვენე პარტია ალტერნატივა გერმანიისთვის დეპუტატმა შტეფან კოიტერმა ყოფილი კანცლერი ანგელა მერკელი დიქტატორ ადოლფ ჰიტლერს შეადარა.

ამ ინფორმაციას ZDF ავრცელებს.

ოთხშაბათს საპარლამენტო დებატების დროს კოიტერმა პირდაპირ არ დაასახელა ჰიტლერი, მაგრამ თქვა: "ბოჰემიელი კაპრალის გარდა, არავის არასოდეს მოუტანია გერმანიისთვის იმდენი უბედურება, რამდენიც ყოფილმა კანცლერმა."

"ბოჰემიელი კაპრალი" ჰიტლერს 1930-იანი წლების დასაწყისში გერმანიის პრეზიდენტმა პოლ ფონ ჰინდენბურგმა ზიზღით უწოდა და ამით აბუჩად იგდებდა მას, მაგრამ მოგვიანებით კანცლერად დანიშნა.

ბუნდესტაგის ვიცე-პრეზიდენტმა, კატრინ გერინგ-ეკარდტმა, რომელიც სხდომას თავმჯდომარეობდა, პოლიტიკოსს შენიშვნა მისცა.

მან აღნიშნა, რომ ყველას თავისუფლად შეუძლია გამოხატოს თავისი აზრი, "მაგრამ პირადი შეურაცხყოფა მიუღებელია."

"და ასევე მიუღებელია ამ ქვეყანაში პოლიტიკოსების გაიგივება მათთან, ვინც ნაცისტური რეჟიმის დროს იყვნენ ხელისუფლებაში, ძალიან არასერიოზულია," - აღნიშნა მან.

მწვანეთა პარტიის დეპუტატმა იურგენ ტრიტინმა დაგმო კოიტერი და მერკელის "ყველა დროის უდიდეს ომის დამნაშავესთან" გაიგივებაში დაადანაშაულა.

"ეს არის ნაციონალ-სოციალიზმის რელატივიზაცია, ეს არის ის, რაც თქვენ აქ გააკეთეთ. და ეს მიუღებელია," - თქვა მან.

მანამდე გავრცელდა ინფორმაცია, რომ ავსტრიის ულტრამემარჯვენე თავისუფლების პარტიის (FPO) ახალგაზრდულმა ფრთამ გაავრცელა ვიდეო, რომელიც განადიდებს ფაშისტ მოაზროვნეებს და შეიცავს ცნობებს ქვეყნის ნაცისტურ წარსულზე.