ახალი ამბები

გერმანიის კანცლერმა ფრიდრიხ მერცმა განაცხადა, რომ ევროპისა და აშშ-ის უსაფრთხოების გარანტიებით გათვალისწინებულ "უკრაინის ევროპულ ძალებს," გარკვეულ გარემოებებში, შეეძლებათ წინააღმდეგობა გაუწიონ რუსულ ძალებს.

ვითარების არსი: ტელეკომპანია ZDF-თან ინტერვიუში, ჟურნალისტების კითხვაზე შესაძლო უსაფრთხოების გარანტიების შესახებ, მერცმა თქვა, რომ გარანტორებს მოუწევთ რუსული ძალების მოგერიება ზავის ნებისმიერი პირობის დარღვევის შემთხვევაში.

• "ჩვენ უზრუნველვყოფთ დემილიტარიზებულ ზონას მეომარ მხარეებს შორის და, უფრო კონკრეტულად რომ ვთქვათ, ჩვენ ასევე ვიმოქმედებთ რუსეთის შესაბამისი შემოჭრებისა და თავდასხმების წინააღმდეგ. ჩვენ ჯერ აქამდე არ მივსულვართ," - აღნიშნა გერმანიის კანცლერმა.
• "ის, რომ ამერიკელებმა აიღეს ასეთი ვალდებულება - დაიცვან უკრაინა ცეცხლის შეწყვეტის შემთხვევაში ისე, თითქოს ის ნატოს ტერიტორიაა - ვფიქრობ, ეს არის ამერიკის შეერთებული შტატების ახალი პოზიცია, რომელიც ყურადღებას იმსახურებს," - ხაზი გაუსვა მერცმა. 

სტრიქონებს შორის: ორშაბათს, ბერლინში, ევროპელ ლიდერთა შეხვედრაზე თავდაცვის ძალების ფორმირების ინიციატივა გამოითქვა, რომელიც უკრაინაში შესაძლო ზავის პირობების შესრულებას უზრუნველყოფს.

• ერთობლივ განცხადებაში ნათქვამია, რომ ევროპის ხელმძღვანელობით შექმნილი ძალები, აშშ-ის მხარდაჭერით, დაეხმარება უკრაინის შეიარაღებულ ძალებს და უზრუნველყოფს საჰაერო სივრცისა და საზღვაო აკვატორიის უსაფრთხოებას.
• უკრაინის პრეზიდენტმა ვოლოდიმირ ზელენსკიმ მანამდე აღნიშნა, რომ უსაფრთხოების გარანტიების განხილვაში "სერიოზული წინსვლაა."

დიდი სურათი: The New York Times წყაროებზე დაყრდნობით წერს, ბოლო რამდენიმე თვის განმავლობაში პირველად, ევროპელმა მაღალჩინოსნებმა ამერიკელ მომლაპარაკებლებთან ეფექტურად იმუშავეს.

• NYT-ის ცნობით, ამერიკელი და ევროპელი თანამდებობის პირების განცხადებით, უსაფრთხოების საკითხებზე დოკუმენტების პროექტები კვირას და ორშაბათს, ბერლინში, უკრაინის პრეზიდენტ ვოლოდიმირ ზელენსკისა და უკრაინის სხვა წარმომადგენლებთან გამართული რვა საათზე მეტი ხანგრძლივობის ინტენსიური დისკუსიების დროს დამუშავდა.
• მოლაპარაკებებში მონაწილეობდა ათამდე ევროპული ქვეყნის, მათ შორის საფრანგეთის, გერმანიის, იტალიისა და ბრიტანეთის ხელისუფლება და ეროვნული უსაფრთხოების საკითხებში პასუხისმგებელი პირები.
• დოკუმენტების ერთ-ერთი პროექტი აყალიბებს ზოგად პრინციპებს. ორი ამერიკელი მაღალჩინოსნისა და რამდენიმე ევროპელი დიპლომატის თქმით, ეს არის ვალდებულება, რომელიც ნატოს მე-5 მუხლის გარანტიის მსგავსია - სადაც წევრი ქვეყნები იღებენ ვალდებულებას, დაეხმარონ ნებისმიერ ქვეყანას, რომელიც თავდასხმის მსხვერპლი გახდება.
• შეთანხმების კიდევ ერთი ნაწილი, რომელსაც ამერიკელმა ჩინოვნიკებმა "სამხედროებს შორის ოპერატიული დოკუმენტი" უწოდეს, უფრო დეტალურ ინფორმაციას შეიცავს.
• მასში განმარტებულია, თუ როგორ ითანამშრომლებენ ამერიკული და ევროპული ძალები უკრაინელ სამხედროებთან, რათა გარანტირებული იყოს, რომ რუსეთი მომავალში უკრაინის ტერიტორიის ხელახლა მიტაცებას აღარ შეეცდება.