ახალი ამბები

გერმანიის ეკონომიკის მინისტრი რობერტ ჰაბეკი რუსულ ნავთობზე ემბარგოს დადებას უნგრეთის მონაწილეობის გარეშეც დაუჭერს მხარს.

„თუ ევროკომისიის პრეზიდენტი იტყვის, რომ ამას [ემბარგოს გამოცხადებას] 26 წევრი ვაკეთებთ - უნგრეთის გარეშე - ამ გზას მხარს ყოველთვის დავუჭერ“, - განაცხადა მწვანე მინისტრმა გერმანულ საზოგადოებრივ რადიოსთან ინტერვიუში.

ჰაბეკის თქმით, ის დარწმუნებულია, რომ ევროკავშირი კონსენსუსის მიღწევას შეძლებს, თუმცა პროცესის გაჭიანურებაზე უკმაყოფილება გამოთქვა.

ევროკავშირის ქვეყნები უკვე რამდენიმე კვირაა, რაც რუსულ ენერგო-ექსპორტზე სანქციების დადებას განიხილავენ.

აღმოსავლეთ და ცენტრალური ევროპის რამდენიმე ქვეყანა, მათ შორის უნგრეთი, ემბარგოში მონაწილეობას არ აპირებს ან სანქციებისგან შეღავათებს ითხოვს.

ბლოკის მიერ სანქციების ამოქმედებას ყველა წევრი სახელმწიფოს თანხმობა სჭირდება.