ახალი ამბები

ორი წლის წინ ჩატარებული საპარლამენტო არჩევნების შემდეგ, გერმანიაში მმართველი კოალიციის პოპულარობა ყველაზე დაბალ ნიშნულამდე დაეცა/ 

საზოგადოებრივი აზრის კვლევა სოციოლოგიურმა ინსტიტუტმა Insa-მ გამოაქვეყნა.

ხელისუფლებაში მყოფი სამი პარტიის რეიტინგი ჯამში მხოლოდ 38%-ია: ამომრჩეველთა 18% მზადაა ხმა მისცეს ოლაფ შოლცის სოციალ დემოკრატებს, 13% - ანალენა ბერბოკისა და რობერტ ჰაბეკის მწვანეებს და 7% - კრისტიან ლინდერის თავისუფალ დემოკრატებს.

2021 წლის ბუნდესტაგის არჩევნებზე მათ ბევრად დიდი მხარდაჭერა ჰქონდათ: სოციალ დემოკრატებს - 25.7%, მწვანეებს - 14.8% და თავისუფალ დემოკრატებს - 11.5%.

გამოკითხვის შედეგებით, გერმანიაში ყველაზე პოპულარული პარტია ქრისტიან დემოკრატიული კავშირია (CDU/CSU), რომელსაც მოქალაქეების 27% უჭერს მხარს.

პოპულარობით მეორე ადგილზეა ულტრამემარჯვენე პოპულისტური პარტია ალტერნატივა გერმანიისთვის (AfD) - 21%.

ბოლო კვლევების თანახმად, გერმანელების უმეტესობა უკმაყოფილოა კანცლერ ოლაფ შოლცის მუშაობით.

გაზეთ Bild-ისთვის საზოგადოებრივი აზრის კვლევის ინსტიტუტის INSA-ს მიერ ჩატარებულმა გამოკითხვამ აჩვენა, რომ გერმანიის მოქალაქეების თითქმის ორ მესამედს ქვეყნის სათავეში ახალი მთავრობის მოსვლა სურს.