ახალი ამბები

არაერთმა ქვეყანამ გამოთქვა სურვილი, წვლილი შეიტანონ ევროპაში ენერგეტიკული კრიზისის შემსუბუქებაში. ისრაელი აცხადებს, რომ შეძლებს ევროკავშირს მიაწოდოს გაზის მოცულობის დაახლოებით 10 პროცენტი, რომელიც ევროპამ 2021 წელს რუსეთიდან მიიღო. ამის შესახებ ისრაელის პრემიერ-მინისტრმა იაირ ლაპიდმა ორშაბათს, 12 სექტემბერს, ბერლინში გერმანიის კანცლერ ოლაფ შოლცთან შეხვედრის შემდეგ განაცხადა.

"ჩვენ ვაპირებთ მონაწილეობა მივიღოთ ევროპაში რუსული გაზის ჩანაცვლებაში", - განაცხადა ლაპიდმა შეხვედრის შემდეგ. შოლცმა, თავის მხრივ, აღნიშნა, რომ გერმანია მუშაობს ინფრასტრუქტურის შექმნაზე, რომელიც საშუალებას მას მისცემს მიიღოს ნედლეული ახალი პარტნიორებისგან, რადგან ის უარს ამბობს რუსულ ბუნებრივ აირზე.

ივნისში ისრაელმა და ეგვიპტემ ხელი მოაწერეს შეთანხმებას კაიროში, ევროკომისიის პრეზიდენტის ურსულა ფონ დერ ლაიენის თანდასწრებით, ევროპისთვის თხევადი ბუნებრივი აირის მიწოდების შესახებ. ისრაელს მოუწევს გაზის ტრანსპორტირება მეზობელ ეგვიპტეში, სადაც ნედლეული გადაიქცევა თხევად პროდუქტად, რის შემდეგაც ისინი ტანკერებით ევროპაში გაგზავნიან.

აზერბაიჯანი ევროკავშირს წლის ბოლომდე 30 პროცენტით მეტ ბუნებრივ აირს მიაწვდის

თავის მხრივ, აზერბაიჯანმა განაცხადა, რომ წლის ბოლომდე გეგმავენ ევროკავშირს 30 პროცენტით მეტი ბუნებრივი აირის მიაწოდონ, ვიდრე 2021 წელს. "ევროპისთვის ბუნებრივი აირის მიწოდების მთლიანი მოცულობა 2022 წელს 12 მილიარდ კუბურ მეტრს შეადგენს", - დაწერა აზერბაიჯანის ენერგეტიკის მინისტრმა პარვიზ შაჰბაზოვმა Twitter-ზე. მისი თქმით, ქვეყანაში აგვისტოსთვის წარმოება თითქმის 10 პროცენტით გაიზარდა და 30.6 მილიარდ კუბურ მეტრს მიაღწია.

ბრიუსელი ივლისში ბაქოსთან  მომდევნო წლებში აზერბაიჯანიდან გაზის იმპორტის გაორმაგებაზე შეთანხმდა. ასევე იგეგმება გაზის დერეფნის გაფართოება, რომელიც გადის აზერბაიჯანზე, საქართველოს, თურქეთსა და საბერძნეთზე. მილსადენის სიმძლავრის გაზრდა წელიწადში 20 მილიარდ კუბურ მეტრამდე იგეგმება.

ევროკავშირი კარგად არის მომზადებული რუსული გაზის შესაძლო სრული შეწყვეტისთვის. ეს განცხადება 3 სექტემბერს ეკონომიკის საკითხებში ევროკომისარმა პაოლო ჯენტილონიმ იტალიის ქალაქ ცერნობიოში გამართულ ეკონომიკურ ფორუმზე გააკეთა. ამასთან, მან ხაზგასმით აღნიშნა, რომ ევროკავშირი აქტიურად ავსებს თავის გაზის საცავებს და იღებს ზომებს ენერგიის დაზოგვის მიზნით.

"ჩვენ არ გვეშინია პუტინის გადაწყვეტილებების", - თქვა ჯენტილონიმ და დასძინა, რომ ევროკავშირი რუსეთს ხელშეკრულებების დაცვას მოითხოვს და წინააღმდეგ შემთხვევაში "მზადაა უპასუხოს".