ახალი ამბები

ორმაგმა აგენტმა ირანიდან, რომელმაც შიიტური ტერორისტული ორგანიზაცია ჰეზბოლას სტრუქტურებში შეაღწია, ისრაელის არმიას მიაწოდა ინფორმაცია დაჯგუფების ლიდერის, ჰასან ნასრალას ადგილსამყოფელის შესახებ, რამაც IDF-ს მისი განადგურების საშუალება მისცა.

ამის შესახებ ფრანგული გაზეთი Le Parisien შაბათს, 28 სექტემბერს ლიბანის უსაფრთხოების სამსახურებში წყაროზე დაყრდნობით წერს.

გამოცემის ცნობით, 27 სექტემბერს ჰასან ნასრალა ჰეზბოლას დრონების დანაყოფის მეთაურის მუჰამედ ჰუსეინ სრურის დაკრძალვას დაესწრო, რომელიც წინა დღეს ისრაელის საჰაერო თავდასხმის შედეგად დაიღუპა. დაკრძალვა ჰარეთ ჰრეიკის რაიონში, ჯგუფის მიწისქვეშა სამეთაურო ცენტრის მახლობლად შედგა.

ამავდროულად, ისრაელის F-35-ები, რომლებიც ბუნკერის საწინააღმდეგო ბომბებით იყვნენ აღჭურვილი, ჩასაფრებულები ელოდნენ სამიზნის ჰეზბოლას შტაბ-ბინაში დაბრუნებას.

დღის მეორე ნახევარში ირანელმა აგენტმა ისრაელს ნასრალას მოახლოების შესახებ აცნობა. ის თავის შტაბში დაკრძალვისთანავე ირანელი ისლამური რევოლუციის გვარდიის კორპუსის ელიტური ქვედანაყოფის, ალ-ყუდსის ძალების მეთაურის მოადგილის, გენერალ-მაიორი აბას ნილფორუშანის მანქანით მივიდა. 

Le Parisien წერს, რომ ტერორისტული დაჯგუფების საგანგებო შეხვედრაში ნასრალას გარდა კიდევ 12 მეთაური მონაწილეობდა. ისრაელელი სამხედროები დაელოდნენ სანამ ყველა ერთ ოთახში შეიკრიბებოდა.

გაზეთის წყაროს ცნობით, საერთო ჯამში, ისრაელის თავდაცვის ძალების პილოტებმა ჰეზბოლას სამეთაურო ცენტრზე 6 ბომბი ჩამოაგდეს, რომელთაგან თითოეული 2 ტონას იწონის. მანამდე Ynet-მა დაწერა, რომ ტერორისტული ორგანიზაციის შტაბ-ბინაზე ჩამოგდებული ბომბების საერთო წონა 80 ტონას აღემატებოდა.

ჰეზბოლას ლიდერის, ჰასან ნასრალას მკვლელობა

ჰეზბოლას ლიდერი ჰასან ნასრალა 27 სექტემბერს, ისრაელის თავდაცვის ძალებმა ავიაიერიშით მოკლეს. დაღუპულთა შორის იყო ირანის რევოლუციის გუშაგთა კორპუსის მეთაურის მოადგილე, გენერალ-მაიორი აბას ნილფორუშანი, რომელიც ირანიდან ლიბანში გაგზავნეს ჰეზბოლას დასახმარებლად.

ნასრალა რადიკალურ შიიტურ მოძრაობას ლიბანში სამ ათწლეულზე მეტი ხნის განმავლობაში ხელმძღვანელობდა.

"მისი მმართველობის 32 წლის განმავლობაში ის პასუხისმგებელი იყო ისრაელის მრავალი მშვიდობიანი მოქალაქისა და ჯარისკაცის მკვლელობაზე, ასევე ათასობით ტერორისტული თავდასხმის დაგეგმვაზე და განხორციელებაზე მთელს მსოფლიოში, რომლის დროსაც დაიღუპნენ სხვადასხვა ეროვნების მშვიდობიანი მოქალაქეები." - აღნიშნა IDF-მა.

გერმანიაში, შეერთებულ შტატებსა და რამდენიმე სხვა ქვეყანაში ტერორისტულ ორგანიზაციად აღიარებული ჰეზბოლას მოძრაობის წინააღმდეგ "პრევენციული სამხედრო ოპერაცია" ისრაელმა 2024 წლის სექტემბრის მეორე ნახევარში დაიწყო. ისრაელის საჰაერო თავდასხმის შედეგად ტერორისტული დაჯგუფების რამდენიმე ლიდერი მოკვდა.

ამავე დროს, ლიბანის ჯანდაცვის სამინისტროს ცნობით, ისრაელის საჰაერო თავდასხმების დროს ასობით ადამიანი დაიღუპა, მათ შორის ქალები და ბავშვები.