ახალი ამბები

შეერთებული შტატები უკრაინას დამატებით HIMARS-ებს გადასცემს. ამის შესახებ აშშ-ის ეროვნული უშიშროების საბჭოს სტრატეგიული კომუნიკაციების კოორდინატორმა ჯონ კირბიმ 19 ივლისს გამართულ ბრიფინგზე განაცხადა.

"ამ კვირის ბოლოს ადმინისტრაცია გამოაცხადებს იარაღისა და აღჭურვილობის შემდეგ პაკეტს უკრაინისთვის", - თქვა კირბიმ.

მისი თქმით, ეს უკრაინის დახმარების მე-16 პაკეტი იქნება.

"პაკეტში შედის მეტი HIMARS, რომელსაც უკრაინელები ძალიან ეფექტურად იყენებენ ბრძოლის ველზე", - თქვა კირბიმ.

შეერთებული შტატები ასევე უკრაინას დამატებით საბრძოლო მასალას გადასცემს ზალპური ცეცხლის რეაქტიული სისტემებისა და არტილერიისთვის.

8 ივლისის მდგომარეობით, პენტაგონის მონაცემებით, ბაიდენის ადმინისტრაციის ხელისუფლებაში მოსვლის შემდეგ შეერთებულმა შტატებმა უსაფრთხოების სექტორში დაახლოებით 8 მილიარდი დოლარის დახმარება გაუწია უკრაინას.