ლიეტუვის სეიმმა "ვაგნერი" ტერორისტულ ორგანიზაციად აღიარა

ლიეტუვის სეიმმა რუსული კერძო სამხედრო კომპანია "ვაგნერი" ტერორისტულ ორგანიზაციად აღიარა. ამის შესახებ 14 მარტს სეიმის პრესსამსახური იტყობინება.

დოკუმენტს ერთხმად დაუჭირა მხარი სეიმის 117-მა წევრმა.

სეიმის მიერ მიღებულ გადაწყვეტილებაში ნათქვამია, რომ "ვაგნერი" ტერორისტული ორგანიზაციაა და მისი წევრები და დაქირავებული მებრძოლები საფრთხეს უქმნიან სახელმწიფოსა და საზოგადოების უსაფრთხოებას.

ასევე, ლიეტუვის პარლამენტმა მკაცრად დაგმო უკრაინის წინააღმდეგ დანაშაულების ჩასადენად რუსეთის ხელისუფლების მხარდაჭერით შექმნილი ნებისმიერი დაქირავებული ჯგუფის გამოყენება.

ტექსტში ნათქვამია, რომ 2022 წლის 24 თებერვალს, უკრაინაში რუსეთის სრულმასშტაბიანი შეჭრის დაწყების შემდეგ, "ვაგნერის" დაქირავებულმა მებრძოლებმა "ჩაიდინეს სისტემატური, მძიმე დანაშაულები - კლავენ და აწამებენ უკრაინაში მშვიდობიანი მოქალაქეებს, თავს ესხმიან საცხოვრებელ შენობებს და სხვა სამოქალაქო ობიექტებს."

დოკუმენტის ავტორებმა ასევე აღნიშნეს, რომ "ვაგნერი" რუსმა ბიზნესმენმა ევგენი პრიგოჟინმა შექმნა, რომელიც რუსეთის პრეზიდენტ ვლადიმერ პუტინთან "დაახლოებული" პირია და "რუსეთის ხელისუფლების ჩრდილოვანი იარაღია", რადგან ის სამხედრო აღჭურვილობას რუსეთის მთავრობისგან უფასოდ იღებს, იყენებს რუსულ სამხედრო ინფრასტრუქტურას და "ვაგნერის" მებრძოლებს რუსული სამხედრო დაზვერვა ამზადებს.

მსგავსი სიახლეები