ახალი ამბები

ვლადიმირ პუტინი პირველად გამოეხმაურა დონალდ ტრამპის მიერ რუსეთის უმსხვილესი სანავთობო კომპანიების წინააღმდეგ დაწესებულ სანქციებს და დონალდ ტრამპთან სამიტის "გადატანა" დაადასტურა. 

ვითარების არსი: ამის შესახებ რუსეთის პრეზიდენტმა გეოგრაფიული საზოგადოების ყრილობის დასრულების შემდეგ ჟურნალისტებთან საუბარში განაცხადა. 

• პუტინის თქმით, შეერთებული შტატების მიერ როსნეფტისა და ლუკოილის წინააღმდეგ დაწესებული სანქციები "არ აისახება" რუსეთის ეკონომიკის მდგომარეობაზე - "არცერთი ქვეყანა, რომელიც პატივს სცემს თავის თავს არ აკეთებს არაფერს წნეხის ქვეშ"- ამბობს პუტინი. 
  
  
• პუტინის თქმით, შესაძლო სანქციები განიხილეს დონალდ ტრამპთან გამართულ ბოლო სატელეფონო საუბარში - მისი თქმით, იმ შემთხვევაში თუ გლობალურ ბაზარზე სანქციების შედეგად რუსული ნავთობის წილი შემცირდება ეს ფასების ზრდას გამოიწვევს, რაც თავის მხრივ ამერიკასაც შეეხება. 
  
  

დიდი სურათი: ამავე გამოსვლაში ვლადიმირ პუტინმა დონალდ ტრამპთან დაგეგმილი შეხვედრის გაუქმებაზეც ისაუბრა -  და განაცხადა, რომ "მაღალი ალბათობით საუბარია შეხვედრის გადატანაზე."

• პუტინის თქმით, შეხვედრის ინიციატივა ამერიკულმა მხარემ გამოთქვა და ლოკაციაც მათ შეარჩიეს, რასაც ის დაეთანხმა, თუმცა მიაჩნდა, რომ სერიოზული მომზადების გარეშე შეხვედრა შეცდომა იქნებოდა.
  
  
• პუტინი ამბობს, რომ ტრამპთან შეთანხმებით შეხვედრის მოსამზადებლად პირველი ნაბიჯი საგარეო უწყებების ხელმძღვანელებს უნდა გადაედგათ - "ახლა კი ვხედავ, რომ პრეზიდენტმა ტრამპმა გააუქმა ან გადადო შეხვედრა... რა შემიძლია ვთქვა, დიალოგი ყოველთვის უკეთესია." 
  
  

კონტექსტი: ამავე გამოსვლაში პუტინი უკრაინისთვის ტომაჰავკის ტიპის შორეული რაკეტების შესაძლო გადაცემის საკითხსაც გამოეხმაურა და ამას ესკალაციის მცდელობა უწოდა. 

• პუტინის თქმით, შორეული რაკეტების გადაცემაზე რუსეთის პასუხი "სერიოზული იქნება, რომ არ ვთქვათ გამაოგნებელი."