ახალი ამბები

The Wall Street Journal-ის მიერ მომზადებული მასალის თანახმად, ევროპელი ლიდერები შიშობენ, რომ რუსეთთან კონფლიქტი იმაზე მალე მოხდება, ვიდრე ნატო მზად იქნება. ახალმა სამხედრო სიმულაციამ აჩვენა, რომ კრემლს ალიანსის ერთიანობის დარღვევა მცირე ძალებითაც შეუძლია.

ვითარების არსი: აქამდე ბერლინსა და სხვა დედაქალაქებში მიიჩნევდნენ, რომ რუსეთი ნატოსთვის საფრთხე 2029 წლამდე არ გახდებოდა. ახლა ეს პროგნოზი გადაიხედა.

• რუსეთი იმაზე სწრაფად ივსებს მარაგებს და აძლიერებს ძალებს ნატოს საზღვრებთან, ვიდრე ევროპის თავდაცვის ინდუსტრია რეაგირებს.

• კრემლმა რესურსების მობილიზება მოახდინა, რაც ბევრად აღემატება უკრაინაში მიმდინარე კამპანიის საჭიროებებს.

კონფლიქტი: Die Welt-ის მიერ ორგანიზებულმა ომის სიმულაციამ, სადაც 2026 წლის ოქტომბრის სცენარი გათამაშდა, შემდეგი აჩვენა:

• რუსეთმა "ჰუმანიტარიული კრიზისი" გამოიყენა კალინინგრადის ექსკლავთან დერეფნის გასაჭრელად და ლიეტუვის ქალაქი მარიამპოლე დაიკავა;

• რუსეთის მიერ ინტერვენციის "ჰუმანიტარიულ მისიად" წარმოჩენამ ნატოს წევრებს შორის ყოყმანი გამოიწვია;

• აშშ-მა უარი თქვა მე-5 მუხლის ამოქმედებაზე, გერმანია ვერ ჩამოყალიბდა, პოლონეთმა კი ჯარი არ გაგზავნა. სულ რაღაც 15,000 ჯარისკაცით რუსეთმა ნატოს სანდოობა გაანადგურა.

დამატებითი საფრთხეები: აქამდე მიჩნეული იყო, რომ რუსეთი ნატო-ზე თავდასხმას 2029 წლამდე ვერ გაბედავდა. ახლა კონსენსუსი იცვლება - კრიზისი შეიძლება ბევრად უფრო მალე დადგეს.

• ევროპასა და აშშ-ს შორის არსებული დაძაბულობა (უკრაინის, ვაჭრობისა და გრენლანდიის გამო) რუსეთს აგრესიისკენ უბიძგებს.
• თუ უკრაინაში აქტიური საბრძოლო მოქმედებები შენელდება, რუსეთს შეუძლია მომენტალურად გამოათავისუფლოს 200,000 გამოცდილი ჯარისკაცი - იმაზე მეტი, ვიდრე 2022 წლის შეჭრისას ჰყავდა.

რატომ არის მნიშვნელოვანი: რუსეთის სტრატეგია ეყრდნობა არა მხოლოდ ძალას, არამედ დასავლეთის ნებისყოფის გატეხვას. პუტინი ელოდება ხელსაყრელ მომენტს, რათა დაამტკიცოს, რომ ნატოს კოლექტიური თავდაცვის პრინციპი არ მუშაობს.

კონტრარგუმენტები: უკრაინა დროს ყიდულობს; რუსეთი თვეში 30,000-მდე ჯარისკაცს კარგავს, რაც მისი ძალების დაგროვებას ანელებს.

• ლიეტუვის შეიარაღებული ძალები მზად არიან დამოუკიდებელი წინააღმდეგობისთვის და აფრთხილებენ კრემლს, რომ აგრესიის შემთხვევაში რუსეთი კალინინგრადს დაკარგავს.