ახალი ამბები

შვეიცარიის მთავრობამ გაყინა ქვეყნის ტერიტორიაზე არსებული ყველა აქტივი, რომელიც ნიკოლას მადუროსა და ვენესუელის პრეზიდენტთან დაახლოებულ პირებს ეკუთვნით.

ვითარების არსი: შესაბამისი გადაწყვეტილება, რომელიც შვეიცარიის ფედერალურმა საბჭომ 5 იანვარს მიიღო არ ეხება ვენესუელის მოქმედი მთავრობის წევრებს.

• "თუ მომავალი სასამართლო პროცესების შედეგად დადგინდება, რომ სახსრები უკანონო გზით იყო მოპოვებული, შვეიცარია ძალისხმევას არ დაიშურებს, რომ ის ვენესუელელი ხალხის საკეთილდღეოდ გამოიყენონ," - ნათქვამია განცხადებაში.

ჩაშლილად: ასევე, შვეიცარიაში ხაზგასმით აღნიშნეს, რომ აქტივების გაყინვა არის ვენესუელის წინააღმდეგ დაწესებული სანქციების დამატებითი ღონისძიება, რომელიც 2018 წლიდან მოქმედებს.

• განცხადებაში აღინიშნა, რომ მადუროს ხელისუფლებისგან ჩამოცილების მიზეზები აქტივების გაყინვაში გადამწყვეტ როლს არ თამაშობს, ისევე როგორც საკითხი — "ხელისუფლება მან კანონიერად დაკარგა თუ საერთაშორისო სამართლის დარღვევით."
• აქტივების გაყინვა ძალაში 5 იანვარს შევიდა და ოთხი წლის განმავლობაში, შემდგომ გადაწყვეტილებამდე იმოქმედებს.

დიდი სურათი: 3 იანვრის ღამეს აშშ-მა ვენესუელაზე დარტყმების სერია განახორციელა, რის შემდეგაც ქვეყნის ლიდერმა, ნიკოლას მადურომ აშშ სამხედრო აგრესიაში დაადანაშაულა. მალევე ამერიკელმა სამხედროებმა მადურო და მისი მეუღლე შეიპყრეს და ნიუ-იორკში გადაიყვანეს, სადაც მადუროს გასამართლებას აპირებენ.

• ოპერაცია ერთმნიშვნელოვნად დაგმეს რუსეთმა, ბელარუსმა, ჩინეთმა და ირანმა.
• აშშ-ის პრეზიდენტმა დონალდ ტრამპმა განაცხადა, რომ აშშ ვენესუელის "მართვას" იქამდე გეგმავს, სანამ ხელისუფლების დემოკრატიული გადაბარება არ მოხდება. მოგვიანებით ის ვენესუელის პრეზიდენტის მოვალეობის შემსრულებლის, დელსი როდრიგესს დაემუქრა და მიანიშნა, რომ მან შესაძლოა მადუროს ბედი გაიზიაროს.