ახალი ამბები

ერევნის რამდენიმე სასამართლომ მიიღო გადაწყვეტილება მთავარეპისკოპოს ბაგრატ გალსტანიანს და სომხეთის მთავრობის დამხობის შეთქმულებაში ბრალდებულ კიდევ 14 პირს ორთვიანი წინასწარი პატიმრობა მიუსაჯოს.

State Of Play: დაკავებულ 15 პირს სომხეთის ხელისუფლება ტერორისტული თავდასხმებისა და სახელმწიფო გადატრიალების დაგეგმვაში ადანაშაულებს. დაკავებები ოთხშაბათს ცნობილი ოპოზიციონერისა და მთავარეპისკოპოსის, გალსტანიანის დაპატირებით დაიწყო, რომელიც ანტისამთავრობო მოძრაობა "წმინდა ბრძოლის" ლიდერია.

• ხუთშაბათს, საგამოძიებო კომიტეტმა განაცხადა, რომ ჩხრეკის გაგრძელების შედეგად კვლავ იპოვეს "ბრალდებულებისთვის მიკუთვნებული ქმედებების დამადასტურებელი ნივთები," მათ შორის ასაფეთქებელი მოწყობილობები, რომლებიც, მათი თქმით, "ქუჩის ელექტროგაყვანილობისა და ინტერნეტ კავშირის კაბელების დაზიანებისთვის იყო განკუთვნილი."
• ფოტოებზე ნაჩვენებია დიდი რაოდენობით ფერადი ციმციმები, ფეიერვერკებით სავსე ყუთები, კომპიუტერები და ლეპტოპები.
• გალსტანიანთან ერთად, ოთხშაბათს, ხელისუფლებამ ათობით ოპოზიციონერის სახლებში ჩაატარა ჩხრეკა.

Big Picture: მთავარეპისკოპოსის პოლიტიკური მოძრაობა "წმინდა ბრძოლა" ადრე ცნობილი იყო, როგორც "ტავუშის მოძრაობა სამშობლოსთვის."

• ის 2024 წლის გაზაფხულზე დაარსდა, როგორც აზერბაიჯანთან საზღვრის დელიმიტაციის პროცესის საწინააღმდეგო საპროტესტო მოძრაობა, რომელიც ტავუშში, საზღვარზე მდებარე პროვინციაში დაიწყო.
• მოძრაობა თანდათან მთავრობის საწინააღმდეგო საპროტესტო აქციების ორგანიზატორად იქცა, რომლებიც პრემიერ-მინისტრ ნიკოლ ფაშინიანის გადადგომას მოითხოვდნენ.

Context: ხუთშაბათს, პროკურატურამ სისხლის სამართლის საქმე აღძრა კიდევ ერთი მაღალი რანგის სასულიერო პირის, მთავარეპისკოპოს მიქაელ აჯაფაჰიანის წინააღმდეგ, ძალაუფლების უზურპაციისკენ საჯარო მოწოდებებში ბრალდებით.

• "სომხეთში სამხედრო გადატრიალების მოწყობა აუცილებელია," - განაცხადა აჯაფაჰიანმა.
• რეიდებიდან და დაპატიმრებებიდან მეორე დღეს, ფაშინიანმა საქმის გახსნაში ჩართული სომხეთის სამართალდამცავი ორგანოების თანამშრომელბის ​​სახელმწიფო ჯილდოზე წარდგენა მოითხოვა.
• სომხეთის პრემიერის თქმით, ქვეყანაში "კიდევ ერთი 27 ოქტომბერი" აღიკვეთა.
• მან 1999 წლის 27 ოქტომბერს მომხდარი ტერორისტული თავდასხმა გაიხსენა, რომელშიც ხუთკაციანი ჯგუფი მონაწილეობდა, რომლებმაც პრემიერ-მინისტრი ვაზგენ სარგსიანი, პარლამენტის თავმჯდომარე კარენ დემირჩიანი და კიდევ ექვსი მინისტრი და დეპუტატი მოკლეს. მიუხედავად იმისა, რომ მკვლელები გასამართლდნენ და დააპატიმრეს, საქმე, ძირითადად, გაუხსნელი რჩება.