ახალი ამბები

ხუთშაბათს, თეთრმა სახლმა ახსნა თავისი გადაწყვეტილება, რატომ არ არის რუსეთი, ჩრდილოეთ კორეა, კუბა ან ბელორუსი იმ ქვეყნების სიაში, რომელსაც დონალდ ტრამპმა ტარიფები დაუწესა.

State Of Play: თეთრი სახლის ოფიციალურმა წარმომადგენელმა The Hill-ს განუცხადა, რომ ოთხი ქვეყანა "არ არის საპასუხო ტარიფების აღმასრულებელ ბრძანებაში, რადგან მათ უკვე დაწესებული აქვთ უკიდურესად მაღალი ტარიფები და ადრე დაწესებული სანქციები გამორიცხავს რაიმე მნიშვნელოვან ვაჭრობას ამ ქვეყნებთან."

• მაღალჩინოსანმა აღნიშნა, რომ ტრამპი "ბოლო დროს რუსეთს მკაცრი სანქციების დაწესებით დაემუქრა."

Big Picture: პრეზიდენტმა ტრამპმა ოთხშაბათს 10%-იანი საბაზისო ტარიფი დააწესა აშშ-ში იმპორტირებულ საქონელზე, მაგრამ ბევრ ქვეყანას ბევრად უფრო მაღალი ტარიფები დაუწესა, მათ შორის ჩინეთი, ვიეტნამი, იაპონია, ინდოეთი, სამხრეთ კორეა, ტაილანდი, შვეიცარია, ინდონეზია, მალაიზია, კამბოჯა და ევროკავშირი.

• ჩინეთისთვის დაწესებული ტარიფი ყველაზე მაღალია: პრეზიდენტმა ოთხშაბათს 34%-იანი ტარიფი გამოაცხადა, რომელიც ადრე დაწესებულ 20%-ს დაემატება და ჯამში გადასახადის მთლიანი მოცულობა 54%-ია.
• სხვა ქვეყნები, რომლებსაც მაღალი ტარიფები დაუწესდათ არის ვიეტნამი (46%), ტაივანი (32%), ინდონეზია (32%) და კამბოჯა (49%).
• აშშ-ის პრეზიდენტმა ამ გადაწყვეტილებას "ისტორიული ბრძანება" უწოდა: "ჩემი აზრით, ეს არის ერთ-ერთი ყველაზე მნიშვნელოვანი დღე ამერიკის ისტორიაში."
• მან ასევე დაადასტურა, რომ ის 25%-იან ტარიფს დააწესებს შეერთებულ შტატებში ყველა ავტომობილის იმპორტზე.
• ტრამპის მიერ საქართველოსთვის დაწესებული ტარიფი 10%-ია. 2024 წელს საქართველოდან აშშ-ში ექსპორტის მოცულობა 141 მილიონი აშშ დოლარი იყო, ყველაზე დიდი საექსპორტო პროდუქტი კი  ფეროშენადნობები - 90 მილიონი დოლარი.

Context: ტრამპმა გასულ თვეში განაცხადა, რომ განიხილავს რუსეთისთვის დამატებითი სანქციების და ტარიფების დაწესებას, რათა მოსკოვი მოლაპარაკებების მაგიდასთან დასვას უკრაინაში ომის დასრულების მიზნით. რამდენიმე კვირის შემდეგ რუსეთმა თქვა, რომ ის ელის, რომ აშშ შეამსუბუქებს გარკვეულ სანქციებს, რაც უკრაინასთან ცეცხლის შეწყვეტის შეთანხმების ნაწილი იქნება.