ახალი ამბები

პოლონეთის პრემიერ-მინისტრმა დონალდ ტუსკმა მწვავე კომენტარი გააკეთა პრეზიდენტ ანჯეი დუდას ბოლო განცხადებებზე, რომელმაც თქვა, რომ აპირებს ვეტო დაადოს კანონს აბორტის ნაწილობრივი დეკრიმინალიზაციის შესახებ.

ამის შესახებ ტუსკმა X-ზე (Twitter) დაწერა.

პოლონეთის პრემიერ-მინისტრმა თქვა, რომ დუდა ვაშინგტონში ნატოს სამიტზე გაემგზავრა, რათა "სატელევიზიო ინტერვიუში შეეფურთხებინა პოლონეთის მთავრობისთვის და ახალი ვეტო გამოეცხადებინა."

"ეს არ არის პრეზიდენტის მისია. სირცხვილია!" - დაამატა მან.

ტუსკი გულისხმობდა დუდას ინტერვიუს პოლონურ ტელეარხ TVN24-თან, სადაც მან დაადასტურა, რომ ხელს არ მოაწერს კანონპროექტს, რომელიც ითვალისწინებს ორსულობის მეთორმეტე კვირამდე აბორტის ნაწილობრივ დეკრიმინალიზაციას.

მემარჯვენე ტელეარხ Republika-სთან სხვა ინტერვიუში პოლონეთის პრეზიდენტი თავს დაესხა ტუსკის მთავრობას, რომელიც მან დაადანაშაულა "კანონისა და კონსტიტუციის უხეშ დარღვევაში." მან გაიხსენა ყოფილი მინისტრების, მარიუშ კამინსკის და მაჩიეი ვონსიკის დაპატიმრება.

პოლონეთის მთავრობა, დონალდ ტუსკის ხელმძღვანელობით, ცდილობს ქვეყნის კანონმდებლობა უფრო ლიბერალური გახადოს, მათ შორის აბორტის შეზღუდვის შემსუბუქებით, მაგრამ სამთავრობო კოალიციაში განხეთქილებამ პროგრესი შეანელა.

გამოკითხვები აჩვენებს, რომ პოლონელების უმრავლესობა მხარს უჭერს აბორტის დაშვებას დედის ჯანმრთელობისთვის სერიოზული საფრთხის შემთხვევაში, ასევე ნაყოფის დეფექტების არსებობისას.