ახალი ამბები

უკრაინის შეიარაღებული ძალების საჰაერო ძალების საზენიტო-სარაკეტო ძალებმა 12 ივნისს ხარკოვის ოლქის ქალაქ იზიუმთან რუსული გამანადგურებელი Su-34 ჩამოაგდეს. ამის შესახებ ფეისბუქზე უკრაინის საჰაერო ძალების სარდლობა იტყობინება.

მათი ცნობით, რუსული ავიაცია წყვილში მუშაობდა და უტევდა უკრაინის დამცველების პოზიციებს.

"უკრაინის საჰაერო თავდაცვის ზონაში დარტყმის შემდეგ, მტრის ერთ-ერთმა თვითმფრინავმა კურსი შეიცვალა, მეორის პილოტებმა კი გადაწყვიტეს ბედი ეცადათ. ასე მივულოცეთ ოკუპანტებს რუსეთის დღე", - ნათქვამია განცხადებაში.

თვითმფრინავი დროებით ოკუპირებულ ტერიტორიაზე ჩამოვარდა. ზუსტდება გადარჩნენ თუ არა მტრის პილოტები.

სარდლობამ დასძინა, რომ იმავე დღეს საზენიტო-სარაკეტო ქვედანაყოფმა ჩამოაგდეს რუსული უპილოტო თვითმფრინავი Orlan-10, ხოლო საჰაერო ძალების დამრტყმელმა თვითმფრინავებმა რამდენიმე საჰაერო იერიში განახორციელეს საოკუპაციო ძალების პოზიციებზე.

"ძლიერი დარტყმები მივაყენეთ მტრის ტექნიკას და ცოცხალ ძალას. საჰაერო დარტყმის შედეგად განადგურდა სარაკეტო და საარტილერიო შეიარაღება", - ნათქვამია განცადებაში.

რუსეთის აგრესიის დაწყებიდან დღემდე უკრაინელებმა 213 თვითმფრინავი და 585 უპილოტო საფრენი აპარატი ჩამოაგდეს.