ურსულა ფონ დერ ლაიენი ევროკომისიის თავმჯდომარედ ხელახლა აირჩიეს
![](https://realpolitika.ge/storage/images/cache/900x440/ursu.jpg)
ევროპარლამენტმა ურსულა ფონ დერ ლაიენი ევროკომისიის პრეზიდენტად მეორე ხუთწლიანი ვადით ხელახლა აირჩია.
ფონ დერ ლაიენის დანიშვნას მხარი ევროპარლამენტის 401-მა წევრმა დაუჭირა, წინააღმდეგი 284 იყო, 15-მა წევრმა კი თავი შეიკავა, ხოლო კიდევ შვიდი ხმა ბათილად იქნა ცნობილი. ხელახლა არჩევისთვის ევროკომისიის ხელმძღვანელს მინიმუმ 361 ხმა უნდა მიეღო.
კენჭისყრა ფარული იყო, ამიტომ ბოლო დრომდე არ იყო ცნობილი, შეძლებდა თუ არა ევროკომისიის ხელმძღვანელი საკმარისი მხარდაჭერის მიღებას.
ევროპარლამენტის "მემარცხენე" ჯგუფის წარმომადგენლებმა კენჭისყრის გადადება მოითხოვეს ევროპული სასამართლოს გადაწყვეტილების გამო, სადაც საუბარია მის როლზე კორონავირუსის ვაქცინების შესყიდვაში, მაგრამ დეპუტატების დიდი უმრავლესობა ამას ეწინააღმდეგებოდა.
თავის საარჩევნო პროგრამაში ფონ დერ ლაიენმა პირობა დადო, რომ გააძლიერებს ევროკავშირის თავდაცვის პოლიტიკას, ასევე ახალი პოზიციების დანერგვას ევროკომისიაში - კერძოდ, თავდაცვის, საბინაო, ხმელთაშუა ზღვის რეგიონისა და მეთევზეობის საკითხებში ევროკომისრის თანამდებობას.
მან ასევე პირობა დადო, რომ ხელს შეუწყობს ევროკავშირის კონკურენტუნარიანობას და მასში უკრაინის, მოლდოვას, საქართველოსა და დასავლეთ ბალკანეთის ქვეყნების ინტეგრაციას.
ურსულა ფონ დერ ლაიენის კანდიდატურა ევროკომისიის პრეზიდენტის პოსტზე ევროკავშირის ლიდერებმა ივნისის ბოლოს გამართულ არაფორმალურ სამიტზე შეათანხმეს, ევროკავშირის სხვა მაღალჩინოსნებთან ერთად.
ფონ დერ ლაიენის დანიშვნა ჯერ არ ნიშნავს ახალი ევროკომისიის მუშაობის დაწყებას: ევროპარლამენტმა უნდა დაამტკიცოს ყველა კომისრის კანდიდატურა, რასაც შესაძლოა კვირები დასჭირდეს.
2019 წელს ევროკომისიამ მუშაობა 1 დეკემბერს დაიწყო.