ზელენსკი: უკრაინას უსაფრთხოების გარანტიები ნატოში გაწევრიანებამდე სჭირდება
უკრაინამ უსაფრთხოების ეფექტიანი გარანტიები ნატოში გაწევრიანებამდეც უნდა მიიღოს. ამის შესახებ 15 აპრილს, უკრაინის პრეზიდენტმა ვოლოდიმირ ზელენსკიმ საღამოს ვიდეომიმართვაში განაცხადა.
"რუსეთი უნდა გავიდეს უკრაინის ტერიტორიიდან. მთელი უკრაინიდან და ყველა ოკუპანტი. და გაეროს წესდების ყველა პუნქტი კვლავ უნდა ამოქმედდეს - რუსეთის მიერ საერთაშორისო სამართლის არც ერთი დარღვევა არ შეიძლება იგნორირებული იყოს", - აღნიშნა პრეზიდენტმა.
მისი თქმით, სწორედ ამ პრინციპებზე დაბრუნდება უსაფრთხოება და სიმშვიდე საერთაშორისო ურთიერთობებში და სწორედ ამისთვის არის მშვიდობის უკრაინული ფორმულა, აბსოლუტურად რეალური და საკმაოდ კონკრეტული.
"ეს [მშვიდობის ფორმულა] ასევე დეტალურად განიხილეს დღეს [საფრანგეთის პრეზიდენტთან] ემანუელ მაკრონთან, ასევე საერთაშორისო მოვლენებზე, რომლებისთვისაც წელს ვემზადებით, კერძოდ, ვილნიუსის ნატოს სამიტზე", - განაცხადა ზელენსკიმ.
უკრაინის პრეზიდენტმა აღნიშნა, რომ ლიეტუვის სამიტის ყველა მონაწილე სახელმწიფოს საერთო პოზიცია შეიძლება იყოს ისეთივე ამბიციური, როგორც ევროპის უსაფრთხოების საჭიროებები.
"ამაში დარწმუნებული ვარ. უკრაინისთვის უსაფრთხოების ეფექტური გარანტიები, ანუ, საერთაშორისო წესრიგისთვის, რომელიც დაფუძნებულია წესებზე, საჭიროა მანამდეც კი, სანამ ალიანსს შევუერთდებით", - თქვა მან.
