ახალი ამბები

ოკუპირებულ აფხაზეთში, სოხუმის პედაგოგთა სახლში უკრაინაში რუსეთის ინტერვენციის მონაწილე, მოხალისე დიმიტრი ცვიჟბას დაკრძალვის ცერემონია გაიმართა. ის რუსეთის მხარეს მებრძოლი "პიატნაშკას" ბატალიონის შემადგენლობაში იბრძოდა.

ამ ინფორმაციას Эхо Кавказа ავრცელებს.

27-28 დეკემბრის ღამეს დონეცკის ოლქში, ავდიივკასთან ახლოს, სამი აფხაზი მოხალისე დიმიტრი ცვიჟბა, ნოდარ აბიჟბა და ადამ ლაგვილავა დაიღუპა.  

ცვიჟბას დაკრძალვაზე აფხაზეთის თვითგამოცხადებული რესპუბლიკის პირველი ვიცე-პრემიერი ბესლან ჯოპუა, ვიცე-პრემიერი, ფინანსთა მინისტრი ვლადიმერ დელბა, თავდაცვის მინისტრი ვლადიმერ ანუა, შინაგან საქმეთა მინისტრი ვალტერ ბუთბა და პარლამენტის დეპუტატები მივიდნენ.

მანამდე უკრაინაში ოთხი აფხაზი მოხალისე მოკვდა - ახრა კირკინაძე, არტურ კირკინაძე, ლორან სმირი და ბესლან თაფაგუა.