ახალი ამბები

დონალდ ტრამპის თქმით, ვენესუელას დიქტატორი დაპატიმრებულია და ცოლთან ერთად გაყვანილია ქვეყნიდან - ამერიკელი პრეზიდენტის განცხადებას რეჟიმის ინფრასტრუქტურაზე განხორციელებული მასშტაბური საჰაერო დარტყმები უძღოდა წინ. 

ვითარების არსი: მადუროს დაპატიმრების შესახებ დონალდ ტრამპმა 3 იანვრის დილის საათებში გამოაცხადა. 

• თავის მხრივ ღამით განხორციელებულ მასშტაბური საჰაერო დარტყმებს წინ უძღოდა კარიბის ზღვის აუზში ამერიკული სამხედრო ფლოტის უპრეცედენტო კონცენტრაცია. 
  
  
• მადუროს ჩიხი - რა ხდება ვენესუელის ირგვლივ

დაეწიე ამბავს: Asociated Press-ის ცნობით, ღამის განმავლობაში კარაკასში სულ მცირე 7 აფეთქების ხმა გაისმა, პარალელურად გავრცელდა დაბალ სიმაღლეზე მფრინავი ამერიკული ვერტმფრენების კადრები უშუალოდ ქალაქის საჰაერო სივრცეში. 

• საჰაერო დარტყმების განხორციელებამდე ამერიკის ავიაციის სააგენტომ დახურა ვენესუელას საჰაერო სივრცე ამერიკული კომერციული თვითმფრინავებისთვის. 

ჩაშლილად: მადუროს ვიცე-პრეზიდენტმა, დელსი როდრიგეზმა სატელევიზიო მიმართვაში განაცხადა, რომ მათთვის უცნობია მადუროსა და მისი ცოლის, სილია ფლორესის ადგილმდებარეობა და აშშ-სგან მოითხოვა მტკიცებულება, რომ ისინი ცოცხლები არიან. 

• იუტას სენატორის, მაიკ ლის თქმით, სატელეფონო საუბარსი მარკო რუბიომ განუცხადა, რომ მადურო ამერიკული მართლმსაჯულების წინაშე წარდგება - "რუბიო არ პროგნოზირებს ახალ სამხედრო მოქმედებებს, ჯერჯერობით"- ამბობს ლი. 

წინარეისტორია: მადუროს კორუფციისა და ნარკოტრაფიკის ბრალდება აშშ-ს იუსტიციის დეპარტამენტმა 2020 წელს წარუდგინა, ხოლო სახელმწიფო დეპარტამენტმა მადუროს დაპატიმრებისთვის ხელშემწყობი ინფორმაციისთვის 50 მილიონი დოლარის ჯილდო დააწესა. 

• "ტირანი დაემხო, როგორც იქნა ის აგებს პასუხებს თავისი დანაშაულებისთვის"- განაცხადა მარკო რუბიოს მოადგილემ კრისტოფერ ლანდაუმ. 

ბოლო ცნობები: მადუროს დაპატიმრების შესახებ გავრცელებული ცნობების შემდეგ New York Times-სთან გამართულ 50-წამიან სატელეფონო საუბარში პრეზიდენტმა ტრამპმა განაცხადა, რომ ეს იყო "ბრწყინვალე" ოპერაცია მადლობა გადაუხადა მასში მონაწილე სამხედროებს. 

• ტრამპის თქმით, რომ ადგილობრივი დროით 11 საათზე (თბილისის დროით 20 საათზე) მარ-ა-ლაგოში ვრცელ პრეს-კონფერენციას გამართავს, სადაც პრესის კითხვებსაც უპასუხებს. 
  
  
• მადუროს დაპატიმრებას ცოტა ხნის წინ გამოეხმაურა იუსტიციის მდივანი, პემ ბონდი, რომლის თქმითაც, მადურო წარდგება ამერიკული მართლმსაჯულების წინაშე ამერიკულ მიწაზე. 
• მადუროს დაპატიმრების ცნობების შემდეგ თავის პირველ საჯარო აქტივობაში სახელმწიფო მდივანმა, მარკო რუბიომ გადააზიარა თავისი პოსტი 2025 წლის ივლისიდან - "მადურო არ არის ვენესუელის პრეზიდენტი და მისი რეჟიმი არ არის ლეგიტიმური მთავრობა"- ნათქვამია განცხადებაში. 

რას ამბობენ ვენესუელაში: მადუროს რეჟიმის წარმომადგენლებიდან ბოლო მიმართვა გენერალურმა პროკურორმა, ტარეკ უილიამ სააბმა გაავრცელა, რომელმაც ხალხს ქუჩაში გამოსვლისკენ მოუწოდა. 

• ცოტა ხნით ადრე გავრცელდა შინაგან საქმეთა მინისტრის, დიოსდადო კაბელოს განცხადება, რომელმაც მოქალაქეებს სიმშვიდის შენარჩუნებისკენ და ქვეყნის პოლიტიკური ხელმძღვანელობის მიმართ ნდობისკენ მოუწოდა. 
  
  
• ამერიკის საჰაერო დარტყმებამდე ცოტა ხნით ადრე მადუროს რეჟიმი ქვეყანაში საგანგებო მდგომარეობა და სამხედრო მობილიზაცია გამოაცხადა - თავდაცვის მინისტრმა, ვლადიმირ პადრინო ლოპეზმა, რომელმაც ამერიკის ინტერვენციას ვენესუელას ისტორიაში "ყველაზე თავხედური" თავდასხმა უწოდა.
  
  

საერთაშორისო რეაქცია: კარაკასში განვითარებულ მოვლენებს ერთ-ერთი პირველი რუსეთის საგარეო საქმეთა სამინისტრო გამოეხმაურა, რომელმაც "დაგმო" აშშ-ს საჰაერო დარტყმები. 

• რუსეთის საგარეო უწყებაში განაცხადეს, რომ "აშშ ვენესუელას წინააღმდეგ შეიარაღებული აგრესია ჩაიდინა" - МИД-მა მხარეებს მოუწოდა თავი შეიკავონ ესკალაციისგან და გამოსავალი დიალოგის გზით იპოვონ. 
  
  
• მადუროს დაპატიმრებას ჯერჯერობით არანაირი რეაქცია არ მოჰყოლია ჩინეთის მხრიდან, თუმცა ბოლო შეხვედრა დაპატიმრებამდე მადურომ სწორედ სი ძინფინგის ლიდერის სპეციალურ წარმომადგენელთან გამართა. 
  
  
• მადუროს დაპატიმრებას მიესალმა არგენტინის პრეზიდენტი - "თავისუფლება იმარჯვებს"- დაწერა თავის სოციალურ ქსელებში ხავიერ მილეიმ. 
  
  
• მეზობელ ქვეყანაში განვითარებულ მოვლენებს ყურადღებით აკვირდება კოლუმბია, პრეზიდენტ გუსტავო პეტროს თქმით, მან უკვე გასცა ბრძანება სასაზღვრო ზოლში დამატებითი სამხედრო ძალების განთავსების შესახებ, იმ შემთხვევაში თუ ადგილი ექნება ლტოლვილების ახალ ნაკადს.