ახალი ამბები

ირანის წინააღმდეგ სამხედრო ოპერაციის წარმატებული საწყისი ფაზის შემდეგ ისრაელის ავიაცია სრულად დომინირებს ცაში, ხოლო მისი ლიდერები სულ უფრო ხმამაღლა განიხილავენ რეჟიმის ცვლილების იდეას. 

State Of Play: ინფორმაციას ამის შესახებ გამოცემა Axios საკუთარ წყაროებზე დაყრდნობით ავრცელებს - ამასთანავე მასალაში აღნიშნულია, რომ რეჟიმის ცვლილების თაობაზე ვაშინგტონსა და თელ-ავივის პოზიციებს შორის მნიშვნელოვანი სხვაობაა. 

• გასული 48 საათის განმავლობაში ისრაელის პრემიერ-მინისტრმა რამდენიმეჯერ საჯაროდ მიანიშნა მსგავსს შესაძლებლობაზე, თუმცა წყაროების ცნობით, დონალდ ტრამპი ასეთი განვითარების წინააღმდეგ გამოდის. 
  
  
• ამაზე მეტყველებს ისიც, რომ დასავლური მედიის ცნობით, გასულ უქმეებზე, როდესაც ისრაელის მთავრობა ირანის უმაღლესი ლიდერის, ალი ხამენეის ლიკვიდაციის განიხილავდა, ამას პრეზიდენტ ტრამპის წინააღმდეგობა მოჰყვა. 
  
  
• "ეს არის ვითარება, როდესაც აიათოლას წინააღმდეგ, რომელსაც უკვე იცნობ არის აიათოლა, რომელზეც არაფერი იცი"- ამბობს თეთრი სახლის მაღალჩინოსანი. 
  
  
• ამასთანავე, წყარო არ გამორიცხავს, რომ მოვლენათა განვითარების ფონზე შეიცვალოს დონალდ ტრამპის პოზიციაც - "მას ყოველთვის შეუძლია დიდი ნაბიჯის გადადგმა."
  
  

Big Picture: გასული ღამით, დონალდ ტრამპმა თეირანის 10 მილიონ მაცხოვრებელს სასწრაფო ევაკუაციისკენ მოუწოდა, თუმცა ამასთანავე ამერიკელი პრეზიდენტი ამბობს, რომ ახალი ბირთვული შეთანხმების მიღწევა კვლავ რეალურია. 

• რაც შეეხება სამხედრო ოპერაციაში პირდაპირ ჩართულობას წყაროების ცნობით, ამგვარ განვითარებას თეთრი სახლი მხოლოდ იმ შემთხვევაში განიხილავს, თუ ირანი რეგიონში მდებარე ამერიკულ სამხედრო ბაზებს შეუტევს. 
  
  
• ისრაელის არმიის მაღალჩინოსნები Axios-სთან საუბარში ამბობენ, რომ რეჟიმის ცვლილება არ არის მიმდინარე სამხედრო ოპერაციის ოფიციალური მიზანი. 
  
  
• "ეს არ არის ისრაელის უსაფრთხოების კაბინეტის მიერ არმიისა და დაზვერვისთვის გაცემულ დავალებებსა და ბრძანებებს შორის, ძალოვან უწყებებს პოლიტიკურ დონეზე მსგავსი ბრძანება არ მიუღიათ"- ამბობს ერთ-ერთი მათგანი. 
  
  
• თუმცა, საუბრები ირანში რეჟიმის ცვლილების შესახებ ისრაელის პოლიტიკურ ხელმძღვანელობაში სულ უფრო აქტიურად და ხმამაღლა მიმდინარეობს. 

Сontext: 14 ივნისს Fox News-თან ინტერვიუში ბიბი ნეთანიაჰუმ განაცხადა, რომ ისრაელის მიმდინარე ოპერაცია შესაძლოა ირანის რეჟიმის ცვლილებით დასრულდეს. უკვე 15 ივნისს ABC-სთან საუბარში ისრაელის პრემიერმა უარყო მოსაზრება, რომ ხამენეის მკვლელობა კონფლიქტის ესკალაციას გამოიწვევდა და განაცხადა, რომ ეს პირიქით, ბოლოს მოუღებდა ომს. 

• "ეს ძალიან, ძალიან სუსტი რეჟიმია, რომელსაც ესმის თუ რამდენად სუსტია, ჩვენ შესაძლოა ირანში ძალიან ბევრი ცვლილება ვიხილოთ"- განაცხადა 16 ივლისს გამართულ პრესკონფერენციაზე ნეთანიაჰუმ. 
  
  
• ამ კონტექსტში ისრაელის პრემიერმა განაცხადა, რომ ვერავინ ივარაუდებდა საბჭოთა კავშირის, ან თუნდაც ასადის სირიის დამხობას. 
  
  

Go Deeper: თეთრ სახლში ამბობენ, რომ მხარს უჭერენ ისრაელის გაცხადებულ მიზანს - ირანის ბირთვული პროგრამის განადგურებას, მაგრამ არა უფრო მასშტაბურ მისიას ირანში პოლიტიკურ ცვლილებებთან დაკავშირებით. 

• "შესაძლოა ებრაელები უფრო კომფორტულად უყურებენ რეჟიმის ცვლილების პერსპექტივას ირანში, ვიდრე ჩვენ, შესაძლოა მათ ნაკლებ დისკომფორტს ჰგვრიდეს მთელი ქვეყნის განადგურება, ვიდრე ჩვენ"- ამბობს წყარო ტრამპის ადმინისტრაციიდან. 
• ამასთანავე, ისრაელის მიერ წამოწყებული სამხედრო ოპერაციის ფონზე ირანში ფართომასშტაბიანი საპროტესტო გამოსვლები არ გამართულა. 
  
  
• "ამ დროისთვის რეჟიმი ინარჩუნებს ერთიანობას საგარეო საფრთხის წინაშე. უსაფრთხოების ნაწილში განცდილმა ჩავარდნამ გააღრმავე ირანელების უნდობლობა რეჟიმის მიმართ, მაგრამ დაზიანებული საცხოვრებელი სახლებისა და დაჭრილი მშვიდობიანი მოქალაქეების კადრები, აძლიერებს ეროვნული სოლიდარობის განცდას"- ამბობს გამოცემასთან საუბარში ირანის ექსპერტი, რაზ ზიმიტი.