ახალი ამბები

დანიის პრემიერ-მინისტრმა მეტე ფრედერიკსენმა ხუთშაბათს, გრენლანდიაში ვიზიტის დროს, არქტიკაში თავდაცვის სფეროში თანამშრომლობის გაზრდის სურვილი გამოთქვა და მტკიცედ უარყო აშშ-ის მიერ დანიის ნახევრად ავტონომიური ტერიტორიის ანექსია.

State Of Play: ფრედერიკსენის ვიზიტი მოჰყვა ვაშინგტონსა და კოპენჰაგენს შორის თვეების განმავლობაში მიმდინარე დაძაბულობას, რისი მიზეზიც დონალდ ტრამპის განცხადებებია შეერთებული შტატების მიერ გრენლანდიის შეერთების შესახებ.

• გრენლანდიის ყოფილ და მომავალ პრემიერ-მინისტრებთან ერთად ჩატარებულ პრესკონფერენციაზე ფრედერიკსენმა ინგლისურად საუბარი დაიწყო და აშშ-ს მიმართა.
• "მინდა ვისარგებლო შემთხვევით და პირდაპირ ამერიკის შეერთებულ შტატებს მივმართო," - თქვა ფრედერიკსენმა სამხედრო გემზე.
• "ეს ეხება არა მხოლოდ გრენლანდიას ან დანიას, ეს ეხება მსოფლიო წესრიგს, რომელიც ჩვენ ერთად ავაშენეთ ატლანტის ოკეანის ორივე მხარეს თაობების განმავლობაში. თქვენ არ შეგიძლიათ სხვა ქვეყნის ანექსია, თუნდაც უსაფრთხოების შესახებ არგუმენტით."
• დანიის ლიდერმა ეჭვქვეშ დააყენა მისი ერის მომავალი ურთიერთობა შეერთებულ შტატებთან, ტრამპის მიერ გრენლანდიის მიტაცების სურვილის გამო.
• "როდესაც თქვენ ითხოვთ დანიის სამეფოს ტერიტორიის ნაწილის წაღებას, როდესაც ჩვენი უახლოესი მოკავშირე გვემუქრება, რისი უნდა გვჯეროდეს იმ ქვეყანაზე, რომლითაც ამდენი წელია აღფრთოვანებული ვიყავით?" - იკითხა მან.

Big Picture: მანამდე აშშ-ის სახელმწიფო მდივანი მარკო რუბიო და დანიის საგარეო საქმეთა მინისტრი ლარს ლოკე რასმუსენი ბრიუსელში შეხვდნენ.

• რასმუსენის თქმით, რუბიომ აღიარა გრენლანდიის თვითგამორკვევის უფლება.
• სახელმწიფო დეპარტამენტის განცხადებაში ნათქვამია, რომ რუბიომ კიდევ ერთხელ დაადასტურა "ძლიერი ურთიერთობა" აშშ-სა და დანიას შორის.
• იმავდროულად, გრენლანდიის მომავალმა პრემიერ-მინისტრმა იენს-ფრედერიკ ნილსენმა, რომელმაც გაიმარჯვა გასული თვის საპარლამენტო არჩევნებში, პრესკონფერენციაზე თქვა, რომ დანიისა და გრენლანდიისთვის მნიშვნელოვანი იყო ერთიანი დგომა ასეთი გარე ზეწოლის პირობებში.

Context: გასულ პარასკევს აშშ-ის ვიცე-პრეზიდენტი ჯეიმს დევიდ ვენსი ამერიკულ სამხედრო ბაზას ეწვია ჩრდილოეთ გრენლანდიაში. მან მკაცრად გააკრიტიკა დანია და აღნიშნა, რომ აშშ უკეთ დაიცავს სტრატეგიულად მნიშვნელოვან კუნძულს.

• ფრედერიკსენმა თქვა, რომ ვენსის მიერ დანიის კრიტიკა "არასამართლიანი იყო."
• "თუ გსურთ უფრო მეტად იყოთ გრენლანდიაში, გრენლანდია და დანია მზად არიან და თუ გსურთ გააძლიეროთ უსაფრთხოება არქტიკაში ისევე, როგორც ჩვენ, მაშინ მოდით ეს ერთად გავაკეთოთ," - აღნიშნა დანიის პრემიერ-მინისტრმა.
• მიუხედავად იმისა, რომ გრენლანდიას მხოლოდ 56 ათასი მოსახლე ჰყავს, მისი სტრატეგიული მდებარეობა არქტიკაში და ბუნებრივი რესურსების მნიშვნელოვანი მარაგი აშშ-ის ხელისუფლების ინტერესს იწვევს.