ახალი ამბები

ევროპელი სოციალისტების პარტია გამოეხმაურა საქართველოს პრემიერ-მინისტრის, ირაკლი ღარიბაშვილის გამოსვლას კონსერვატიული პოლიტიკური მოქმედების კონფერენციაზე.

ევროპელი სოციალისტები ევროკავშირის სიდიდით მეორე პოლიტიკური გაერთიანებაა, ქართული ოცნება კი ამჟამად მათი დამკვირვებელი წევრია.

"პრემიერ-მინისტრ ღარიბაშვილის მოქმედება მიუღებელია და სრულებით სცდება ჩვენი პოლიტიკური ოჯახის ღირებულებებს", - ნათქვამია ევროპელი სოციალისტების ვიცე-პრეზიდენტის, კატი პირის განცხადებაში.

მისი თქმით, ევროპელი სოციალისტების პარტია მომდევნო ყრილობაზე ქართული ოცნების სტატუსს გადახედავს.

"ღარიბაშვილის დღევანდელი გამოსვლის შემდეგ ეს აშკარად აუცილებელი ნაბიჯია", - აცხადებს კატი პირი.

ევროპელი სოციალისტების მომდევნო ყრილობა ივნისში გაიმართება. ქართული ოცნების სტატუსის გადახედვის საკითხი პარტიაში ჯერ კიდევ მარტში, საქართველოში რუსული კანონის მიღების მცდელობის შედეგად დადგა.