ახალი ამბები

თურქეთის საგარეო საქმეთა მინისტრმა, ჰაქან ფიდანმა პარასკევს განაცხადა, რომ ისრაელი ამჟამად "გლობალური უსაფრთხოების პირდაპირ საფრთხეს" წარმოადგენს.

ვითარების არსი:  მან საერთაშორისო თანამეგობრობას "კოლექტიური" რეაგირებისკენ მოუწოდა და აღნიშნა, რომ მზარდი არასტაბილურობის განხილვა მხოლოდ რეგიონულ ჭრილში აღარ შეიძლება.

• გაერთიანებულ სამეფოში ოფიციალური ვიზიტის ფარგლებში, ოქსფორდის უნივერსიტეტში გამოსვლისას, ფიდანმა აღნიშნა, რომ მსოფლიო გადის არა უბრალოდ გეოპოლიტიკურ, არამედ უფრო ღრმა ტრანსფორმაციას.
• "ის, რისი მოწმენიც დღეს ვართ, არ არის გადასვლა, ეს უფრო ტრანსფორმაციაა," - თქვა მან და აღნიშნა, რომ სახელმწიფოებს აღარ შეუძლიათ "საკუთარი უსაფრთხოების, დიპლომატიის ან სტრატეგიული ხედვის აუთსორსინგი."
• ირანის ომთან დაკავშირებით ფიდანმა განაცხადა, რომ ამ კონფლიქტმა "მძიმე დარტყმა მიაყენა გლობალურ კეთილდღეობას, უსაფრთხოებასა და სტაბილურობას."
• "ისრაელის მიერ რეგიონის დესტაბილიზაციის სისტემურმა საფრთხემ, გადაკვეთა ლოკალური საზღვრები და ახლა გლობალური უსაფრთხოების პირდაპირ საფრთხეს წარმოადგენს," - ხაზი გაუსვა მან და დასძინა, რომ მსგავსი ქმედებები "მთელი საერთაშორისო თანამეგობრობისგან კოლექტიურ რეაგირებას მოითხოვს."

ჩაშლილად: ფიდანმა ასევე აღნიშნა, რომ "ზღვარი რეგიონულ და გლობალურ კრიზისებს შორის ნამდვილად გაქრა" და კონფლიქტების, როგორც იზოლირებული შემთხვევების განხილვა, აღარ არის შესაძლებელი.

• მისი თქმით, ამგვარმა გაურკვევლობამ გაზარდა "საშუალო სახელმწიფოების" მნიშვნელობა - ქვეყნების, რომლებსაც აქვთ "სტრატეგიული გეოგრაფია," დიპლომატიური გავლენა და პოლიტიკური ნება შედეგების მისაღწევად.

დიდი სურათი: ევროკომისიის პრეზიდენტის, ურსულა ფონ დერ ლაიენის განცხადების შესახებ კითხვის საპასუხოდ, სადაც მან აღნიშნა, რომ ევროკავშირმა უნდა დაასრულოს ევროპის კონტინენტის ფორმირება, რათა თავიდან აიცილოს "რუსული, თურქული ან ჩინური გავლენა" - ფიდანმა ამ სიტყვებს "სამწუხარო" უწოდა, თუმცა დასძინა, რომ დამყარდა საჭირო კომუნიკაცია და საკითხი უკვე მოგვარებულია.

• მან ასევე მოითხოვა გლობალური ინსტიტუციური რეფორმა და ახლო აღმოსავლეთში რეგიონული წესრიგი, რომელიც დაფუძნებული იქნება თანამშრომლობაზე და არა "დომინირებასა თუ დამორჩილებაზე."
• ფიდანის თქმით, მიმდინარე გეოპოლიტიკური ცვლილებების მართვა ძველი დაშვებებით ან "ავტოპილოტის" რეჟიმით აღარ შეიძლება, რადგან ეს ეპოქა დასრულდა. მისივე განცხადებით, მთავარი კითხვა აღარ არის ის, მოძველდა თუ არა ძველი წესრიგი, არამედ ის - ვინ ჩამოაყალიბებს ახალს და რა პირობებით.
• მან გამოხატა რწმენა, რომ მშვიდობიანი და აყვავებული მომავლის მიღწევა კვლავ შესაძლებელია.