ახალი ამბები

თუ დასავლეთის ქვეყნები გადაწყვეტენ სასწრაფოდ გადასცენ კიევს საბრძოლო თვითმფრინავები, უკრაინას შეუძლია რუსეთთან ომში სრულ გამარჯვებას წელს მიაღწიოს. ეს მოსაზრება ევროპაში აშშ-ის ჯარების ყოფილმა მეთაურმა, გადამდგარმა გენერალ-ლეიტენანტმა ბენ ჰოჯსმა 10 თებერვალს, DW-სთან ინტერვიუში გამოთქვა.

"თუ ჩვენ გავაგრძელებთ ამ დონის შენარჩუნებას (მხარდაჭერის. - რედ.), უკრაინა აუცილებლად გაიმარჯვებს, ამაში ეჭვი არ მეპარება. მაგრამ ამას შეიძლება ხუთ წლამდე დასჭირდეს, ამ დროის განმავლობაში ბევრი უდანაშაულო ადამიანი დაიღუპება. რაც უფრო ადრე მივცემთ მათ შესაძლებლობას მიაღწიონ გადამწყვეტ შედეგს, მით უფრო მალე დასრულდება ყველაფერი. მე მჯერა, რომ ეს (ომი. - რედ) შეიძლება წელს დასრულდეს. უკრაინას შეუძლია დაამარცხოს რუსეთი და აიძულოს იგი დატოვოს ყირიმი და დონბასი. როდემდე გაგრძელდება ომი, ეს ჩვენზეა დამოკიდებული", - თქვა ჰოჯსმა.

მან აღნიშნა, რომ უკრაინელი პილოტების დასავლური გამანადგურებლებისთვის მომზადებასთან დაკავშირებული სირთულეები არ ნიშნავს იმას, რომ შეუძლებელია კიევის თვითმფრინავებით უზრუნველყოფა.

"უკრაინა, რა თქმა უნდა, შეარჩევს თავის საუკეთესო პილოტებს ახალ გამანადგურებლებზე გადასაყვანად. არა ისეთებს, რომ უნივერსიტეტებში გაგზავნონ ნულიდან სასწავლებლად", - განმარტა გენერალმა და დასავლეთის ქვეყნებს მოუწოდა, რომ ეს პროცესი რაც შეიძლება მალე დაიწყოს.

ბენ ჰოჯსის თქმით, გამანადგურებლების მიწოდება ფაქტობრივად არაფრით განსხვავდება HIMARS-ის სისტემების ან Panzerhaubitze 2000-ების კიევისთვის გადაცემისგან. ეს არის შორი მოქმედების ზუსტი იარაღი, რომელიც უკრაინის შეიარაღებულ ძალებს შესაძლებლობას აძლევს დაბომბოს რუსეთის ბაზები, ლოჯისტიკა და სატრანსპორტო სისტემა.

გადამდგარმა გენერალმა აღნიშნა, რომ ერთადერთი "წითელი ხაზი" სამხედრო დახმარებაზე, რომელსაც აშშ და მისი მოკავშირეები არ გადაკვეთენ, არის სამხედრო პერსონალის უშუალოდ ბრძოლის ველზე გაგზავნა ომში მონაწილეობის მისაღებად.

"მაგრამ უკრაინელები ამას არ ითხოვენ, მათ ეს არ სჭირდებათ", - განაცხადა ამერიკელმა გენერალმა.